تل ابیب ۔19اگست (اے پی پی) امریکی وزیر خارجہ انٹونی بلنکن آکھیا جو غزہ مذاکرات دا اڄوکا دور یرغمالیاں دی رہائی سودھے جنگ بندی تئیں پڄݨ دا چھیکڑی موقع اے۔ تاس موجب انہاں تل ابیب اچ اسرائیلی صدر اسحاق ہرزوگ نال ملاقات اچ آکھیا جو اے فیصلہ کن مرحلہ اے اتے ہر کہیں کوں امن تے سلامتی کیتے بہتر راہ تے ٹورݨ، غزہ اچ جنگ بندی کراوݨ اتے یرغمالیاں دی رہائی بارے مذاکرات دا چھیکڑی موقع اے۔ اسرائیلی صدر معاہدے دی عدم موجودگی دا الزام فلسطینی عسکریت پسنداں دے اڳوں ودھݨ توں انکار تے لاتے۔ واضح راہوے جو انٹونی بلنکن ہک رات پہلے اسرائیل پڄیے، انہاں دی اڄ 19 اگست کوں وزیر اعظم بینجمن نیتن یاہو اتے وزیر دفاع یوو گیلنٹ نال ملاقاتاں طے ہن۔
