ملتان۔ 26 اگست (اے پی پی) وفاقی وزیر توانائی سردار اویس لغاری آکھیے آندے ھک سال اچ بجلی دیاں قیمتاں گھٹ نظر آسن ۔ حکومت پنجاب دی طرفوں بجلی صارفین کوں ݙتے ڳئے 45 ارب روپے دے ریلیف کوں شفاف انداز نال صارفین تئیں پڄیسن ۔ اے ڳالھ انھاں میپکو ہیڈ کوارٹرز اچ میڈیا نال الویندیں آکھی اے، انھاں آکھیے آئی پی پیزنال معاملاتِ سانجھی ڳالھ مہاڑ دے بعد ملکی اتے عوامی مفادات موجب طے کیتے ویسن ۔ اویس لغاری آکھیے کیپیسٹی ادائیگیاں دا مسئلہ حل کرݨ سانڳے وی کوششاں کریندے پئن ۔ ھک سوال دے جواب اچ انھاں آکھیے نجکاری توں پہلے ڈسکوز دے معاملات ٹھیک کریسوں۔ پری پیڈ میٹرز دی تنصیب، صارفین دے مسئلیں دے حل تے حکومت پنجاب دے بجلی ٻلاں اچ ݙتے ڳئے ریلیف کوں شفاف انداز نال صارفین تئیں پڄیسوں ۔ اویس لغاری آکھیے وزارت توں سفارش دا کلچر ختم کرݙتا ڳئے، ملتان ریجن اچ 15 فیصد توں ودھ بجلی چوری دیاں رپورٹاں ہن جیں کوں روکݨ سانڳے سخت اقدامات چاتے ویندے پئن تے ایں سلسلے اچ انتظامیہ کوں فری ہینڈ ݙتا ڳئے۔انھاں آکھیے ساݙا ہدف اے سارے میٹرز کوں سمارٹ میٹرز تے منتقل کرݙتا ویسی جیں دا فیدہ سنگل اتے تھری فیز صارفین کوں تھیسی ۔ وفاقی وزیر آکھیے بجلی صارفین دی سہولت اتے شکایات تے وختی کارروائی سانڳے ہیلپ لائن دے نظام کوں مزید موثر بݨایا ویندا پئے۔ایندے توں پہلے وفاقی وزیر توانائی دی زیر صدارت میپکو صدر دفتراچ اجلاس دے دوران ہیلپ لائن نظام دی بہتری،میپکو کارکردگی اتے پنجاب حکومت دی طرفوں بجلی صارفین کوں 45 ارب روپے دے ریلیف کوں شفاف انداز نال صارفین تئیں پڄاوݨ سانڳے تجویزاں تے ڳالھ مہاڑ کیتی ڳئی
