ملتان۔ 27 اگست (اے پی پی) ملتان اچ طوفانی مینھ دا 48 سال دا ریکارڈ ترٹ ڳئے ،چونگی نمبر9 ڈسپوزل اسٹیشن تے147 ملی میٹر مینھ وُٹھے ، منیجنگ ڈائریکٹر واسا خالد رضا خان رین ایمرجنسی نافذ کرݙتی اے تے واسا ملتان دا پاݨی کڈھݨ دا آپریشن مسلسل جاری اے ۔ محکمہ موسمیات موجب ملتان اچ 1976 ء اچ 134.5 ملی میٹر مینھ وُٹھا ہئی ۔ کمشنر ملتان ڈویژن ،ڈپٹی کمشنر اتے ڈی جی ایم ڈی اے کوں ہر ویلھے آپریشن متعلق رپورٹ پیش کیتی ویندی پئی اے۔ زور دا مینھ وسݨ پاروں ملتان دے علاقے پاݨی اچ ٻُݙ ڳئن جیں توں شہریاں کوں آوںڄ اچ اوکھ دا سامݨا ہے ۔ مینھ وسݨ پاروں میپکو دے درجناں فیڈرز وی ٹرپ کر ڳئن، جیں توں ٻہوں علاقیں اچ بجلی معطل رہی ۔ محکمہ موسمیات موجب مینھ وسݨ دا اے سلسلہ آندے کجھ ݙینھ تئیں جاری رہسی
