اسلام آباد۔ 27 آگست (اے پی پی) “آمیݙے دیس وچ” ایجھا ناول ھے جیندی کہانی وستی دی ھک وساخ(ڈیرے)تیں ٻیٹھے لوکیں دی آپسی کھل ٻٹ تے حال حویلے توں منڈھ ٻدھدی ھے۔ جتھاں پوہ دی ھک شام دور پریں دی وستی دا ھک نینگر آن پڄدے جیڑھا روزگار دی ڳول اچ ھے۔ اتھوں کہانی کہیں وݙے مجھنگ وݨ دی کار اپݨی پوری چھاتر(پلاٹ) دے نال ہولی. کھنڈدی ڄلدی ھے۔ ایں ناول اچ پہلی عالمی جنڳ دے پاروں ودھݨ پھلݨ آلی دہشت آمیز جمالیات نال کوئی سانگا نئیں۔ڈاکٹر محبوب تابش دا بیا آکھنڑ ہا جو سائنس اتے ٹیکنالوجی دی ترقی دی اول اچ ھک Savage Man یا انسان دے چھتپ دی جیڑھی راند ریت ٹری ھے ایں کہانی اندر وسدے لوک تے انھیں دی وسوں ایں سارے کہترپ کولوں ہک لوانڈے ہن۔ جیویں جارج آرول اپݨے ناول 1984 اچ اے ݙٹھے جو اَساݙی حیاتی دی وݙی ٻدھ چھوڑ یا تاں سائنس تے ٹیکنالوجی دے ہتھ وس ھے یا پچھیں اینجھی نام نہاد جمہوریت تے سیاست ہتھ ھے جیڑھی ھک پاسوں ساڳی نظام زر دی ٻاہنی ھے تاں ٻئے پاسوں اخلاقی دیوالیہ پن دی ٻدھل نظردی ھے ۔”آمیݙے دیس وچ” دی کہانی ایں سارے دروہ دے ٻاہرو وسدے کہیں بھاڳوند وسوں دے لوک ہن جیڑھے اپݨے تاݨے پیٹے دے ھک خاص جہان اچ جیندن تے وسدن۔ جنھیں دی حیاتی وچ کہیں غیر انسانی ویہاج وپار دی کوئی جھاہ نی۔
حبیب موہاݨے دے ہݨ تائیں دے فکشن اچوں ایہا ڳال پدھری تھیندی ھے او کہانی دی روایتی راند نال جڑ کے اوندے اوں Academics کوں بھن توڑ کے کہیں نویں سانچے دی ڳول یا لابھ دو نئیں تݨدا۔ کہانی تے کرداریں دی وݨتݨ تے آپسی ڳانڈھیں تو ڄاپدے انھیں دا مشاہدہ کتلا ݙونگھا تے نرویا ھے۔او کہیں پل کیتے وی حیاتی تے ڄݨیں دے وجود نال جڑئیل کہیں وی شئےدے بے انت راٻے وچ وی کہیں نکی توں نکی شئے توں اپݨی اکھ پسیلی نئیں کریندا۔ بے عمیق شئیں دے وچالے اپݨے تخلیقی پندھ دی منزل کوں نئیں بھلدے جیویں ناول دا ھک ٹوٹا ݙیکھسو
“نازا ہر ویلھے مکھا چکھا ودا ہوندا ہئی تے او جان تیں مکھی وی نہی ٻاہوݨ ݙیندا: بوسکی آلے کپڑے’تلے آلی چیک مچیکاں کھیڑی ‘ مینڈھے تیں چٹی بوچھݨی۔جیندے لڑ پھندڑاں آلی تماخوں دی ٻوجھی ہوندی ہئی۔ ہتھ وچ سوہنی آلا ٹیپ’ او ڳلی اچ ٻانہہ مار کے اینویں ٹردا ھا جیویں یکے شاہر کوں ٹکر اوہو ݙیندے”
انھاں بئی گالھ کریندے آکھیا جوحبیب موہاݨے فکشن راہیں اپݨی ثقافت تے جیوݨی دی تہذیبی راند کو اینویں سانبھی آندے جیویں امریکہ اچ افریقیں اپݨی ثقافت دی بقا دا ترلا موسیقی نال کیتے۔ حبیب اپݨے ناولیں دی اول اچوں ایں دھرتی تے ایندے لوکیں نال اتھوں دے وݨ ٻوٹیں نال اتھوں دے کیڑے مکوڑیں نال اتھوں دے زناوریں نال اتھوں پکھو پکھشیں نال ۔اے ناول اپݨی وسوں نال محبتیں دی ایں گواہی اچوں اپݨے پڑھݨ ہاریں ناول کلام کریندے۔
ڈاکٹر محبوب تابش اخیر اچ پبلشر بارے آکھےجو پبلی کیشنز لہور کجھ عرصے توں سرائیکی کتابیں کوں چھاپݨ دا ھک نویکلا اہر کیتے۔ایں سوبھ سبھا پاروں سرائیکی وسیب دے تخلیق کاریں دا ہک نواں سانگے ایں ادارے نال گنڈھیجے۔ عکس پبلی کیشنز تے سرائیکی قلم کاریں کوں ایں سانگے دی سوبھ نصیب ہووے۔محمد فہد اگوال (مستقبل) وچ سرائیکی کتابیں کوں کاروبار توں ودھ ھک آدر دی سک نال اگونہے ٹورے ۔(ڈاکٹر سعدیہ کمال)
