اقوام متحدہ۔19ستمبر (اے پی پی) اقوام متحدہ دی جنرل اسمبلی فلسطینی سرزمین توں اسرائیل دے غیر قانونی قبضہ کوں ختم کرݨ دے مطالبے دی قرارداد وݙی اکثریت نال منظور کر ڳھدی اے۔قرارداد دے حق اچ 124 ووٹ پئے ، 43 ملکاں رائے شماری اچ حصہ نی ڳھدا جڈانجو اسرائیل، امریکا اتے ٻئے 12 ملکاں قرارداد دی مخالفت اچ ووٹ ݙتا۔ جنرل اسمبلی اچ اے قرار داد فلسطین ، پاکستان، سعودی عرب، ترکیہ، مصر اتے جنوبی افریقہ سودھے کئی ملکاں ولوں پیش کیتی ڳئی ہئی جئیں اچ اسرائیل توں 12 مہینے دے اندر مقبوضہ فلسطینی علاقے اچ آپݨی غیر قانونی موجودگی ختم کرݨ دا مطالبہ کیتا ڳئیا ہئی۔ قرارداد اچ بین الاقوامی عدالت انصاف (آئی سی جے) دی جولائی اچ جاری کیتی ڳئی ایں مشاورتی رائے دا خیر مقدم کیتا ڳئیا جئیں اچ آکھیا ڳئیا جو فلسطینی علاقیاں اتے وستیاں تے اسرائیل دا قبضہ غیر قانونی اے اتے اینکوں واپسی ڳھدا ونڄݨا چاہیدے۔ جنرل اسمبلی دی قرارداد اچ ریاستاں توں اے وی مطالبہ کیتا ڳئیا جو او مقبوضہ فلسطینی علاقیاں اچ ٻݨی غیر قانونی یہودی وستیاں توں پیدا تھیوݨ آلی مصنوعات دی درآمد کوں روکݨ دے نال نال اسرائیل کوں اسلحہ، گولہ بارود اتے ٻئے سامان دی فراہمی یا منتقلیکوں روکے۔ قرار داد تے رائے شماری مقبوضہ مشرقی بیت المقدس اتے باقی مقبوضہ فلسطینی علاقے اچ اسرائیلی اقدامات تے غور کیتے سݙیے ڳئے جنرل اسمبلی دے ݙاہویں ہنگامی اجلاس اچ تھئی۔
