اسلام آباد۔20ستمبر (اے پی پی) چیئرمین پاکستان کرکٹ بورڈ محسن نقوی نال آئی سی سی دے وفد اسلام آباد اچ ملاقات کیتی جئیں اچ آئی سی سی چیمپئنز ٹرافی ٹورنامنٹ 2025 دی تیاریاں بارے تفصیلی ڳالھ مہاڑ کیتی ڳئی۔ ملاقات اچ آئی سی سی چیمپئنز ٹرافی ٹورنامنٹ دے سکیورٹی انتظامات تے وی ڳالھ کیتی ڳئی۔ آئی سی سی دے وفد کراچی اتے راولپنڈی اچ چیمپئنز ٹرافی بارے کیتے ڳئے انتظامات تے اطمینان کیتا۔ آئی سی سی وفد کراچی اتے راولپنڈی اسلام آباد دے سکیورٹی انتظامات کوں وی تسلی بخش قرار ݙتا۔ چیئرمین پی سی بی محسن نقوی آئی سی سی دے وفد کوں آئی سی سی چیمپئنز ٹرافی کیتے عالمی معیار دے انتظامات دا یقین ݙوایا۔ چیئرمین پی سی بی محسن نقوی آکھیا جو سٹیڈیمز دی اپ گریڈیشن دا کم چیمپئنز ٹرافی توں پہلے ہر صورت پورا کر ڳھدا ویسی۔ ساری ٹیماں کیتے فول پروف سکیورٹی انتظامات کیتے ویسن۔ آئی سی سی چیمپئنز ٹرافی ٹورنامنٹ دا پاکستان اچ تھیوݨ ہک اعزاز اے۔ اپ گریڈیشن دے بعد سٹیڈیمز اچ بین الاقوامی معیار دی سہولتاں ہوسن اتے شائقین کرکٹ میچز توں ودھ محظوظ تھیسن۔ وفد اچ آئی سی سی دی سینئر مینجر ایونٹس سارہ ایڈگر ، ایونٹ مینجر و چیمپئنز ٹرافی ایونٹ لیڈ عون محمد زیدی، جنرل مینجر کرکٹ وسیم خان،سکیورٹی مینجر ڈیوڈ مسکر،براڈ کاسٹ کنسلٹنٹ منصور منج شامل ہن۔پاکستان کرکٹ بورڈ دے ڈائریکٹر انٹرنیشنل کرکٹ عثمان واہلہ، ڈائریکٹر سکیورٹی کرنل ریٹائرڈ خالد محمود، ہیڈ آف مارکیٹنگ سلمان مسعود وی ایں موقع تے موجود ہن۔
