اسلام آباد۔11اکتوبر(اے پی پی) گورنر پنجاب سردار سلیم حیدر خان آکھیے اسلامیہ یونیورسٹی دا نواں وائس چانسلر باصلاحیت اتے قابل بندے کوں بݨایا ویسی تے او کہیں گروہ دا کارندہ نہ ہوسی بلکہ ایں یونیورسٹی کوں وسیب دی مثالی اتے اعلیٰ تعلیمی کارکردگی دی حامل بݨاوݨ اچ آپݨا اہم ترین کردار نبھاݨ آلا ہوسی ۔گورنر پنجاب گورنر ہاؤس اچ پیپلز پارٹی میٹرو پولیٹن کارپوریشن دے صدر ملک امتیاز چنڑ نال ملاقات اچ ڳالھ کریندے پئے ہن ۔گورنر پنجاب سردار سلیم حیدر خان آکھیے بہاول پور سانڳے سیوریج دے میگا پراجیکٹ دے فنڈز دے اجراء سانڳے وزیر اعلیٰ پنجاب نال خود ڳالھ کریساں تے وختی بہاول پور دا دورہ کریساں ، ایں موقع تے ملک امتیاز چنڑ بہاولپور دے مسئلیں دے حل اچ خصوصی دلچسپی گھنݨ تے گورنر پنجاب دا شکریہ ادا کیتے تے آکھیے پیپلز پارٹی پنجاب تے وسیب دے کارکنان اپݨے محبوب چیئرمین بلاول بھٹو زرداری اتے صدر مملکت آصف علی زرداری دے ٻہوں مشکور ہن جنہاں ھک حقیقی جیالے سردارسلیم حیدرخان کوں گورنر پنجاب بݨائے جیں پاروں اڄ گورنر ہاؤس دے دروازے پیپلزپارٹی دے کارکناں تے عام عوام سانڳے ہر ویلھے کھلئے ہوندن تے گورنر کارکناں دے جائز کماں دے حل سانڳے آپݨے عملے سودھے سرگرم رہندن گورنر سردار سلیم صوبہ دے ساریں توں وݙے آئینی عہدے تے ہووݨ دے باوجود عجز و انکساراچ آپݨی مثال آپ ہن او صحیح معنے اچ شہید ذوالفقار علی بھٹو اتے شہید محترمہ بے نظیر بھٹو دی عوام اتے پارٹی کارکناں نال بے لوث محبت دی میراث اڳوں ودھیندے پئن
