ڈیرہ غازی خان۔ 07 نومبر(اے پی پی):ڈیرہ غازی خان دے نیڑے علاقے سخی سرور ٹول پلازہ دے نیڑے نجی سکول دی وین اتے ٹرک اچ ٹکر پاروں 4 بندے جاں بحق اتے 6 زخمی تھی ڳئن ۔ ریسکیو 1122 موجب حادثے اچ نجی سکول دے پرنسپل امجد امین سودھے ترائے تریمت ٹیچرز موقع تے جاں بحق تھی ڳئن جنہاں اچ 19سالہ نوشین ولد درمحمد،58سالہ امجد امین ولد کرم حسین 22سالہ کرن بی بی ولد بگا خان اتے 23سالہ طاہرہ ولد محمد شریف شامل ہن ۔ ریسکیو 1122حکام ݙسائے جو کنٹرول روم کوں کال ملی جیں اچ کال کرݨ آلے ݙسائے ہائی ایس اتے ٹرک وچال ایکسیڈنٹ تھئے۔ جیں اچ تقریبا 10 بندے زخمی ہن ۔کنٹرول روم وختی پنج ایمبولنس ھک موٹر سائیکل ایمبولنس ھک فائر وہیکل اتے ݙو ریسکیو وہیکل موقع تے روانہ کراݙتی ۔ بعد اچ پولیس کنٹرول کوں وی ݙسا ݙتا ۔ریسکیو 1122 ٹیمز حادثے دی جاہ تے پڄی تاں 4 لوک موقع تے جاں بحق اتے 6 تریمت سکول ٹیچر زخمی ہن ۔زخمیاں کوں وختی ٹیچنگ ہسپتال ڈیرہ غازی خان منتقل کرݙتا ڳئے جݙاں جو جاں بحق تھیوݨ آلے لوکاں دیاں میتاں کوں قانونی کارروائی دے بعد وارثاں دے حوالے کرݙتا ویسی۔
