اسلام آباد۔8نومبر (اے پی پی) جامع مسجد ریاض الجنتہ تے اسلامک کمپلیکس دے نگران اتے معروف مخیر شخصیت ڈاکٹر سہیل مجید شیخ آکھیا جو انسانیت دی خدمت اتے معاشرے دے پسماندہ طبقے دی ترقی انہاں دی پہلا مشن اے۔ اے پی پی نال خصوصی انٹرویو اچ انہاں آکھیا جو ہک مہذب معاشرے دے طور اساکوں ہک ݙوجھے دی مدد کرݨی چاہیدی اے۔ انسانیت اساکوں ضرورت منداں دی ݙیکھ بھال دا درس ݙیندی اے۔ ڈاکٹر سہیل مجید شیخ آکھیا جو گزریل 12 سال توں او اتے انہاں دا ادارہ ایران اتے ایراق دے زائرین کوں مفت طبی ݙیکھ بھال ݙیوݨ اچ مصروف اے اتے 20 توں ودھ ملکاں دے لوکاں دی مدد کیتی اے۔ مذید برآں 2008 توں او روات دے ہک کالج اچ یتیماں، محروم ٻالاں اتے شہیداں دے ٻالاں کوں مفت تعلیم ݙیوݨ دے کارخیر شروع کیتے۔ انہاں ٻیا آکھیا جو نثار فاطمہ امین فائونڈیشن (این ایف اے) دے تعاون نال اساں مستحق ٻالاں کیتے کتاباں، یونیفارم، سکول بیگ اتے خوراک سودھے پوری تعلیمی مدد ݙیندے پئیوں۔ انہاں آکھیا جو اے کوششاں اے ڳالھ یقینی ٻݨیندن جو طلبا مالی ٻوجھ دے بغیر معیاری تعلیم حاصل کر سڳن۔ ڈاکٹر سہیل مجید نینگراں تے زور ݙتا جو او خدمت دے جذبے کوں ودھاون اتے حقیقی کامیابیاں ہک ݙوجھے دا ساتھ ݙیوݨ نال ہن۔ انہاں آکھیا جو ݙوجھیاں دی مدد کرݨ انسانیت دا حقیقی سنیھا اے جیڑھا نینگراں کوں خلوص نیت نال کم کرݨ اتے احترام انسانیت کوں اپناوݨ دی ترغیب ݙیندے۔
