بہاولپور۔ 14 نومبر(اے پی پی) حکومت پنجاب ڈائریکٹر انسٹی ٹیوٹ آف فزکس اسلامیہ یونیورسٹی بہاولپور پروفیسر ڈاکٹرسعید احمد بزدار کوں وائس چانسلر تھل یونیورسٹی بھکرتعینات کرݙتے ۔ ایں سلسلے اچ ہائر ایجوکیشن ڈیپارٹمنٹ نوٹیفکیشن جاری کرݙتے ۔ وائس چانسلر اسلامیہ یونیورسٹی بہاولپور پروفیسر ڈاکٹر محمد کامران، ڈینز، اساتذہ کرام اتے طالبیں پروفیسر ڈاکٹرسعید احمدبزدار کوں وائس چانسلرتعینات تھیوݨ تے مبارخ ݙتی اے ۔پروفیسر ڈاکٹر سعیداحمدبزدار تدریس، تحقیق اتے تعلیمی انتظامیہ اچ 24 سال توں ودھ دا تجربہ رکھیندن ۔پروفیسر ڈاکٹر سعید بزدار ھک معزز ماہر تعلیم ہن، جنہاں 2022 اچ ہائر ایجوکیشن کمیشن دا بہترین یونیورسٹی ٹیچر ایوارڈ ڳھدا تے اعلیٰ تعلیم دے منظر نامے تے بااثر کتاب ”علم دی راہداریاں ” تصنیف کیتیاں۔ اسلامیہ یونیورسٹی بہاول پور اچ آپݨے پورے کیریئر اچ پروفیسر ڈاکٹر سعیداحمد بزدار کئی اہم عہدیں تے فائز رہیے ، جنھاں اچ ڈین فیکلٹی آف فزیکل اینڈ میتھمیٹیکل سائنسز تے ڈائریکٹر کوالٹی انہانسمنٹ سیل شامل ہن۔اپݨے قائدانہ کرداراں دے علاوہ، پروفیسر ڈاکٹر سعیداحمد بزدار تحقیق اتے علمی تعاون اچ اہم شراکت کیتی اے ، جیں اچ کوئین میری یونیورسٹی آف لندن، یونیورسٹی کالج لندن، اتے برٹش کونسل، پاکستان سائنس فاؤنڈیشن، اتے ہائر ایجوکیشن کمیشن آف پاکستان دے نال شراکت داریاں شامل ہن ۔ اسلامیہ یونیورسٹی بہاول پور دی پوری کمیونٹی پروفیسر ڈاکٹر سعید احمدبزدارکوں تھل یونیورسٹی بھکر دے وائس چانسلر دے طور تے انھاں دیاں نویاں ذمہ واریاں سنبھالݨ تے نیک خواہشات دا اطہار کریندی اے تے پاکستان دے اعلیٰ تعلیمی منظر نامے تے انھاں دے مسلسل مثبت اثرات کوں ݙیکھݨ سانڳے پرامید اے۔
