اسلام آباد۔18نومبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو پاکستان بینکس ایسوسی ایشن اتے سٹیٹ بینک ولوں کیتے ڳئے اقدامات نال مالیاتی نظام اچ تبدیلی دی راہ ہموار تھیسی۔ اے ڳالھیں انہاں سنوار کوں سٹیٹ بینک دے گورنر اتے پاکستان بینکس ایسوسی ایشن دے چیئرمین نال ورچوئل میٹنگ اچ آکھی۔ ایں موقع تے ترجیحی شعبیاں کیتے مالی عتاون بارے پیشرفت دا جائزہ ڳھدا ڳئیا۔ پاکستان بینکس ایسوسی ایشن دے چیئرمین ظفر مسعود وزیر خزانہ کوں ایسوسی ایشن ولوں جامع اتے پائیدار مالیاتی نظام بارے مختلف منصوبیاں دا ݙسیا۔ انہاں تجویز ݙتی جو الیکٹرانک ویئر ہائوس ریسیپٹ فنانسنگ، ایس ایم ای انڈیکس، کارپوریٹ فارمنگ فنانسنگ، فن ٹیک کمپنیاں کیتے وینچر کیپٹل فنڈ، زرعی کوآپریٹوز دی بحالی اتے مالیاتی ڈیٹا ایکسچینج سویں منصوبے مالیاتی نظام اچ طویل المدتی تبدیلی ڳھن آوݨ کیتے اہم تھی سڳدن۔ وزیر خزانہ سینیٹر محمد اورنگزیب پاکستان بینکس ایسوسی ایشن اتے سٹیٹ بینک آف پاکستان دے کم دی تعریف کیتی اتے آکھیا جو اے اقدامات نہ صرف اہم ہن بلکہ انہاں نال مالیاتی نظام اچ تبدیلی دی راہ ہموار تھیسی۔
