تہران ۔19نومبر (اے پی پی) ایران آکھیا جو اساݙی جوہری تنصیبات تے کہیں وی حملے دا فوری اتے سخت جواب ݙتا ویسی۔ العربیہ اردو دے مطابق ایرانی وزارت خارجہ دے ترجمان اسماعیل بقائی آکھیا جو انہاں دے ملک آپݨے فیدے اتے پر امن جوہری صنعت دے دفاع کیتے ضروری اقدامات کیتن۔ انہاں آکھیا جو اقوام متحدہ دی سلامتی کونسل دی قرارداد 533 جوہری تنصیبات دے خلاف کہیں وی دھمکی یا طاقت دے استعمال دی ممانعت کریندی اے جیڑھا جو بین الاقوامی ایٹمی توانائی ایجنسی دی نگرانی نال مشروط اے۔ انہاں آکھیا جو ایندے اچ نشابر آکھیا ڳئے جو اقوام متحدہ دی سلامتی کونسل ایجھے معاملیاں اچ مداخلت کرݨ دی پابند اے۔ انہاں اعلان کیتا جو ملکاں دی پرامن ایٹمی تنصیبات کوں نشانہ ٻݨاوݨ آلا کوئی وی حملہ یا خطرہ بین الاقوامی امن اتے سلامتی کیتے خطرہ یا خلاف ورزی منیا ویندے۔ اسماعیل بقائی آکھیا جو ایں بارے مینڈیٹ نشابر اے۔ اقوام متحدہ دی سلامتی کونسل کوں ایجھے خطریاں بارے فیصلہ کن اتے نشابر موقف اختیار کرݨا چاہیدے۔ اے انتباہات ایں خدشے اچ سامھے آئن جو اسرائیل ایرانی نیوکلیئر پراجیکٹ اچ رکاوٹ پاوݨ یا ملتوی کرݨ کیتے ایرانی جوہری تنصیبات اتے تحقیقی مراکز کوں نشانہ ٻݨا تے طاقتور حملے کر سڳدے۔
