رحیم یارخان ۔19نومبر (اے پی پی) سعودی عرب توں آئے ڈاکٹرز محمداشرف نون، ڈاکٹر محمدصدیق چوہدری ولوں رحیم یار خان اچ چار ݙینھ دا فری آئی کیمپ شروع تھی ڳئے ۔ چار ݙینھ دے کیمپ اچ جدید طریقہ علاج فیکو نال اکھیں دے آپریشن کیتے ویسن جتھ دوائیں اتے کھانا بلکل فری اے۔ چار ݙینھ دے کمپ اچ پںڄ سو توں ودھ مریضاں دے مفت آپریشن کیتے ویسن۔ گلش میرج لان گلشن اقبال اچ لاتا ڳئیا کیمپ سابق ایگزیکٹو ممبرچیمبرآف کامرس اینڈانڈسٹری چوہدری شفیق الرحمٰن، گورنمنٹ کنٹریکٹر چوہدری شاہد جمیل، چوہدری طلحہ محمدرفیق،صدرڈسٹرکٹ پریس کلب قیصرغفورچوہدری دے خصوصی تعاون نال لاتے ڳئے۔ فری کیمپ دا افتتاح سابق ایم پی اے چوہدری محمدشفیق کیتا، سابق سینئرنائب صدر چیمبرآف کامرس اینڈانڈسٹری چوہدری شوکت حیات، سٹی صدر انجمن تاجران چوہدری عظمان اصغرانہاں دے نال ہن۔ ایں موقع تے ڳالھ مہاڑ کریندیں ہوئیں سعودی عرب توں آوݨ آلے ای این ٹی سپیشلسٹ ایچ اوڈی دمام ہسپتال پروفیسر ڈاکٹر محمداشرف نون، اتے پروفیسر ڈاکٹر محمدصدیق چوہدری آکھیا جو ایں کارخیردا آغاز اساں 2009 اچ کیتا ہئی۔ سعودی عرب اچ اساں ڈاکٹرااں دی ہک تنطیم دے جیڑھی جو آپݨی ذکواۃ دی رقم نال پاکستان دے مختلف شہراں اچ فری آئی کیمپ لاتے مستحقین اتے غریب لوکاں دے اکھیں دے فری آپریشن کریندی اے اتے مفت دوائیں ݙیندی اے۔ رحیم یار خان اچ ایں توں پہلے وی کئی کیمپ لاتے ڳئن اتے ہݨ تئیں اساں اٹھ ہزار مریضاں دے فری آپریشن کیتن اتے اے صدقہ جاریہ اے۔ ایں توں پہلے بالاکوٹ آزاد کشمیر اچ فری کیمپ لاتے ڳئے۔ ہک سال دے بعد پاکسان دے مختلف شہراں اچ اساں فری آئی کیمپ لیندوں جتھ مستحقین فیدہ چیندن۔ ایں موقع تے مزمان خصوصی چوہدری محمد شفیق آکھیا جو کارخیر دے کماں اچ ہر صاحب حیثیت کوں حصہ ڳھݨا چاہیدے۔ انہاں آکھیا جو ڈاکٹرمحمداشرف نون اتے ڈاکٹرمحمدصدیق چوہدری دے ایں نیک کم دی تعریف کیتی اتے اینکوں نعمت قرار ݙتا۔ ایں موقع تے چوہدری شفیق الرحمٰنٰ،چوہدری حمزہ شفیق، چوہدری شاہد جمیل اتے چوہدری طلحہ محمدرفیق جیڑھے جو منتظمین ہن مریضاں کیتے ٻہݨ دی ڄاہ اتے کھاوݨ دا وسیع اہتمام کیتے۔ ماہرڈاکٹرز پہلے ݙینھ 75مریضاں دے مفت فیکوآپریشن کیتن جڈانجو چار ݙینھ دے کمپ اچ پںڄ سو توں ودھ مریضاں دے مفت آپریشن کیتے ویسن۔ مریضاں دی وݙی تعداد ڈاکٹر محمداشرف نون، ڈاکٹرمحمدصدیق چوہدری اتےچوہدری شفیق الرحمٰن دا شکریہ اداکیتا۔
