اسلام آباد۔25نومبر (اے پی پی) پاکستان۔بیلاروس بزنس فورم اچ 8 معاہدے طے تھین۔ پاکستان اتے بیلاروس وچال پںج سال کیتے “نیوٹری فوڈ اینڈ فارماسیوٹیکلز کمپنی” اتے “بیلاکٹ” ولوں مفاہمت دی یادداشت تے دستخط کیتے ڳئن۔ سال 2025 کیتے پاکستان اتے بیلاورس وچال مصنوعات دی فراہمی کیتے “شہزاد ٹریڈ لنکس” اتے “منسک موٹر پلانٹ” مفاہمت دی یادداشت تے دستخط کیتے۔ شہزاد ٹریڈ لنکس” اتے “بیلشینا” وچال پاکستانی منڈی اچ ٹائرز دی فراہمی دی یادداشت تے دستخط کیتے ڳئے۔ ویٹرنری ادویات دی فراہمی کیتے “مصطفی برادرز” اتے “بیل وٹونیفارم” وچال معاہدہ تھیا۔ نیشنل لاجسٹک کارپوریشن” اتے “بیلٹاموز سروس” وچال مفاہمت دی یادداشت دستخط کیتے ڳئے ، فارما انڈسٹری اچ تعاون تے “بائیو میڈیکل سسٹم” اتے “بیلمیڈپریپریٹری” وچال مفاہمت دی یادداشت تے دستخط کیتے ڳئے۔ مصنوعات دی فراہمی کیتے “راس انٹرنیشنل ٹریڈنگ” اتے “بیلٹس ویٹمیٹ” وچال معاہدہ طے تھیا اتے پاکستان ولوں “گرین کارپوریشن انیشی ایٹو” اتے بیلاروس دی “منسک ٹریکٹر ورکس” کمپنیاں وچال دستخط کیتے ڳئے۔ تقریب توں خطاب کریندیں ہوئیں وفاقی وزیر تجارت جام کمال خان آکھیا جو پاکستان اتے بیلاروس وچال تجارت ودھاوݨ ضروری اے، ݙوہیں ملکاں وچال زرعی مشینری اتے آٹوموبائل دے شعبیاں اچ تعاون کوں ودھایا ویسی۔ اے ڳالھیں انہاں سنوار کوں بیلاروس دے وزیر توانائی نال بزنس فورم دی سانجھی صدارت اچ آکھی۔ آپݨے خطاب اچ وفاقی وزیر آکھیا جو پاکستان-بیلاروس بزنس فورم اچ اٹھ مفاہمتی یادداشتاں اتے معاہدیاں تے دستخط کیتے ویسن۔ وفاقی وزیر آکھیا جو پاکستان اچ بیلاروس دے ٹریکٹرز پائیداری اتے مضبوط سمجھیے ویندن۔ انہاں آکھیا جو ݙوہیں ملکاں وچال تجارت دے ودھارے کیتے 2025-27 کیتے روڈمیپ تے اتفاق کیتا ڳئے۔ ݙوہیں ملک عملی اقدامات کریسن۔ انہاں آکھیا جو بیلاروس نال تجارتی رکاوٹاں کوں دور کرݨ اتے مارکیٹ تئیں رسائی کوں سوکھا کرݨ دی لوڑھ اے جئیں تے وفاقی حکومت کم کریندی پئی اے۔ پاکستان خطے اچ تجارتی اتے ٹرانزٹ حب ٻݨاوݨ کیتے پرعزم اے کیونجو پاکستان دنیا دی چھینویں وݙی تجارتی مارکیٹ اے۔
