راولپنڈی۔3دسمبر (اے پی پی) پاک فوج دے سربراہ جنرل سید عاصم منیر آکھیا جو پاکستان دی مسلح افواج سارے خطریاں دے خلاف مادر وطن دی علاقائی سالمیت اتے خودمختاری دی حفاظت کرݨ دی پوری صلاحیت رکھیندی اے۔ آئی ایس پی آر موجب آرمی چیف نارووال اتے سیالکوٹ اچ فیلڈ مشق دے دورہ تے خطاب کریندے ُئے ہن۔ آرمی چیف کوں مشق دے مقاصد بارے بریفنگ ݙتی ڳئی۔ جئیں دا مقصد پیشہ وارانہ مہارتاں اتے میدان جنگ دی طریقہ کار کوں بہتر ٻݨاوݨ ہئی۔ مشق اچ آرمر، انفنٹری، میکانائزڈ انفنٹری، آرٹلری، ایئر ڈیفنس، آرمی ایوی ایشن اتے اینٹی ٹینک گائیڈڈ میزائل یونٹس ولوں مربوط فائر اتے مینیوور آپریشنز کیتے ڳئے۔ ایں مشق اچ جنگی صلاحیتاں اتے معلوماتی آپریشنز دے موثر استعمال دا وی مظاہرہ کیتا ڳئیا۔ آرمی چیف پورا ݙینھ فوجیاں نال میدان اچ رہیے۔ انہاں دی تربیتی معیار، آپریشنل تیاری اتے بلند حوصلے دی تعریف کیتی۔ ایں توں پہلے مشق دے علاقے اچ پجݨ تے کمانڈر گوجرانوالہ کور اتے انسپکٹر جنرل آف ٹریننگ اینڈ ایویلیوایشن آرمی چیف دا استقبال کیتا۔
