ملتان۔ 05 دسمبر (اے پی پی) ملتان اچ نامعلوم تیز رفتار کار دی ٹکر پاروں موٹرسائیکل تے سوار ݙو نینگر جاں بحق تھی ڳئے۔ ریسکیو 1122 موجب حادثہ اڈہ بلی والا،دولے والی پل مویشی منڈی دے نیڑے تھیا۔ حادثے اچ جاں بحق تھیوݨ آلیاں دی سنڄاݨ 18 سالہ عبداللہ ولد مقبول اتے 20 سالہ محمد اصغر ولد رمضان دے ناں نال تھئی اے جیڑھے خیرالمدارس دے طالبعلم ہن۔ریسکیو ٹیم اتے متعلقہ پولیس اطلاع ملݨ تے فوری موقع تے پڄ ڳئے۔ پولیس کاروائی دے بعد لاشاں کوں پوسٹمارٹم کیتے نشتر ہسپتال پڄا ݙتا اتے نامعلوم کار سوار دی ڳول شروع کر ݙتی اے۔
