اسلام آباد۔26دسمبر (اے پی پی) وفاقی وزیر خزانہ سینیٹر محمد اورنگزیب آکھیا جو ڈھانچہ جاتی اصلاحات شروع تھی ڳئن، آمدݨ اتے کھپت دے مطابق ٹیکس دی ادائیگی یقینی ٻݨاوݨ کیتے کم جاری اے۔ ٹیکس ترمیمی بل دا مقصد ٹیکساں کوں ساݙھے 13 فیصد تئیں ڳھن آوݨ اے۔ ٹیکساں بارے اے ہدف اساں ترائے سالیں اچ حاصل کرݨے۔ اسلام آباد اچ وزیر مملکت علی پرویز ملک، وزیر اطلاعات عطا تارڑ اتے چیئرمین ایف بی آر راشد محمود لنگڑیال دے رلے پریس کانفرنس اچ انہاں آکھیا جو اصلاحاتی ایجنڈے اچ ٹیکسیشن دا اہم کردار اے۔ ٹیکس ٹو جی ڈی پی دی اڄوکی شرح نو توں ݙاہ فیصد وچال اے۔ حکومت ٹیکس اتے جی ڈی پی دے ہدف کوں 13 فیصد توں ودھ تئیں ڳھن ونجݨ چاہندی اے۔ انہاں آکھیا جو افراط زر کوں کنٹرول کرݨ کیتے کم تھیندا پئے۔ شفافیت کیتے ڈیجیٹلائزیشن آلے پاسے ویندے پئیوں تانجو انسانی مداخلت کوں تلویں سطح تئیں آندا ونڄے۔ حمد اورنگزیب آکھیاجو ڈیجیٹلائزیشن دی ڳالھ کیتی ویندی اے تاں اینڈ ٹو اینڈ ڈیجیٹلائزیشن آن تے انسانی مداخلت کوں ڳھٹ توں ڳھٹ کرݨ ویندے پئیوں۔ محمد اورنگزیب آکھیا جو کڄھ ݙینھ پہلے جݙاں میں سیالکوٹ چیمبر اچ ہم تاں آکھیا ہئی جو اساں مرغی اتے دال دے نرخاں دا جائزہ ڳھدا ہئی، جو ٹرانسپورٹیشن اتے ٻئے شعبیاں اچ نرخ ڳھٹ تھیندے پئن تاں انہاں ݙو آئٹمز دے نرخ کیوں ودھدے پئن۔ اوندے اساں چیف سیکریٹریز صاحب اتے صوبیاں توں درخواست کیتی جئیں دے بعد مرغی اتے دال دے نرخ وی ڳھٹ تھین۔ وزیر مملکت برائے خزانہ علی پرویز ملک آکھیا جو مالی خسارے کوں کنٹرول کرݨ کیتے وزیر اعظم دی سربراہی اچ گورننس دا معیار بہتر کیتا ڳئے۔ چیئرمین ایف بی آر راشد لنگڑیال آکھیاجو ٹیکسز دا مجموعی خلا 7 ہزار ارب روپے توں ودھ اے۔ ادارے دی استعداد ودھائی ویندی پئی اے۔ 27 لکھ لوک آپݨے ٹیکس گوشوارے جمع نی کرائے۔ اساں ہک لکھ نوے ہزار لوکاں کوں نوٹس جاری کیتن، اوندے بعد 38 ہزار ریٹرن فائل کر ݙتن۔ ٹیکس وصولی اچ اساݙا فوکس ٹاپ 5 تے اے۔
