اسلام آباد۔30دسمبر (اے پی پی) معروف ماہر تعلیم، مصنف، محقق اتے شاعر ڈاکٹر محمد انور صابر دا مجموعہ کلام’’سراب ِدشت ِتمنا‘‘ چھپ ڳئے جئیں دی علمی تے ادبی حلقیاں ولوں تعریف کیتی ڳئی اے اتے اینکوں شعری اسلوب اتے موضوعات دے تنوع دے اعتباد نال عصری تقاضے دا ترجمان آکھیا ڳئے۔
مجموعہ کلام اچ حمدیہ تے نعتیہ کلام ،متنوع اتے متفرق موضوعات تے مبنی پابند ،آزاد اتے نثری نظماں، غزلاں، قطعے اتے فردیات شامل ہن۔ ایں کتاب کوں بکس اینڈ ریڈرز ملتان چھاپیے۔ ڈاکٹر انور صابر 10 اگست1947 کوں بھارت دے شہر جالندھردی وستی حسین پور اچ ڄمیے ہن اتے ہجرت دے بعد ابتدائی تعلیم جڑانوالہ ضلع فیصل آباد توں حاصل کیتی۔ گورنمنٹ کالج فیصل آباد توں ایم اے اردو دی ڈگری حاصل کیتی۔
مختلف مقامات تے تدریسی خدمات انجام ݙیندیں ہوئیں 1975 اچ گورنمنٹ صادق ایجرٹن( ایس ای )کالج بہاولپور دی ممتاز درسگاہ دے شعبہ اردو نال جڑیے اتے بعد اچ اردو ادب اچ پی ایچ ڈی کیتی۔ او وݙے عرصے تئیں تدریسی خدمات ݙیندے رہیے اتے 2008 اچ کالج دے وائس پرنسپل اتے صدر شعبہ اردو دے منصب توں ریٹائرڈ تھیے جتھ انہاں کالج دے علمی تے ادبی مجلے ’’نخلستانِ ادب ‘‘( صد سالہ تحریراں دا انتخاب) اتے’’ خواجہ فرید نمبر‘‘ سویں اہم شمارے چھاپیے۔ ایں توں علاوہ بہاولپور توں ’’حروف‘‘سویں قومی سطح دے ادبی رسالہ دے شریک مدیر وی رہیے۔ او کئیں سالیں تئیں ’’اردو مجلس‘‘ بہاولپور فعال ادبی تنظیم دے معتمد رہیے ۔
ڈاکٹر انور صابر دی ٻئی تصانیف اتے تالیفات اچ انہاں دے پی ایچ ڈی دے تحقیقی مقالہ دی کتاب ’’پاکستان اچ اردو غزل دا ارتقاء ‘‘ دے علاوہ شرح شعری ادب، بی اے دا اردو نصاب برائے اسلامیہ یونیورسٹی بہاولپور شامل ہن۔ ملک دے مختلف ادبی جریدیاں اچ انہاں دے کئی تحقیقی اتے تنقیدی مضامین اتے شعری تے ںثری تخلیقات وی چھپ چکین۔ انہاں دے اڄوکے مجموعہ کلام’’سرابِ دشتِ تمنا‘‘ دا دیباچہ مصنف ، محقق،شاعر ،ناول نگار اتے سابق صدر شعبہ اردو واقبالیات،اسلامیہ یونیورسٹی بہاولپور ڈاکٹر شفیق احمد لکھیے۔
انہاں ڈاکٹر انور صابر دے طرز کلام دی تعریف کریندیں ہوئیں لکھیا جو ڈاکٹر انور صابر داخلی کیفیات کوں وݙی سہولت اتے سادگی نال بیان کرݨ اچ قدرت رکھیندن۔ مشہور مصنف ، نقاد، شاعر اتے منظوم سیرت نگار خورشید ناظر ’’اک نئے طرز تکلم سے فضا مہکی ہے‘‘ دے عنوان نال آپݨے تاثرات کریندیں ہوئیں لکھیا جو ڈاکٹر انور صابر دی تخلیقات کوں پڑھدیں ہوئیں ہمیشہ خود کوں اصناف ادب دے اںج جہان اچ محسوس کیتے۔
انہاں اچ اے انفرادیت صرف انہاں دی لفظیات پاروں نئی بلکہ آپݨی منظومات کیتے چونکا ݙیوݨ آلے موضوعات دے چݨاؤ اتے آپݨے اشعار کیتے تخیل دی بلندی انہاں کوں ٻہوں عمدہ شاعر دے مقام تے فائز کر ݙتے۔ معروف ماہر تعلم اتے مصنف ڈاکٹر خالق تنویر مجموعہ کلام تے آپݨی رائے ݙیندیں ہوئیں آکھیا جو ڈاکٹر انور صابر دا مجموعہ کلام ادھی صدی پہلے ریاضیت دا ثمر اے۔ علمی تے ادبی شخصیت ڈاکٹر ریاض حسین بلوچ دے مطابق ایں مجموعہ اچ فن شعر دے سارے محاسن تے موضوعات ہن اتے کتھائیں احساب کرب تے محرومی اتے کتھائیں امید اتے رڄا نال توانا نظر امسن۔
