اسلام آباد۔30دسمبر(اے پی پی)پاکستان کسان اتحاد ضلع رحیم یار خان دے آرگنائزر اتے بانی کسان اتحاد، معروف سرائیکی دانشور، کالم نگار، کئی کتاباں دے لکھاری، سینئر صحافی زمیندار جام محمد دین المعروف جام ایم ڈی گانگا مرحوم دی قل خوانی گانگا نگر یوسف آباد اچ تھئی۔ قل خؤانی اچ مرحوم دے وݙے پتر جام آصف آمین دی پڳ ٻدھائی مخدوم معیز الدین شاہ ھاشمی اتے جام منظور احمد گانگا، جام مشتاق احمد گانگا، ظہور احمد دھریجہ کیتی ڄݙاں جو خصوصی خطاب معروف عالم دین سید صبغت اللہ شاہ بخاری سہروردی کیتا ڄݙاں جو قرآن خوانی اچ ظہور احمد دھریجہ، خواجہ غلام فرید کوریجہ وی جام ایم ڈی گانگا دی حیاتی دے حالات تے گالھ مہاڑ کیتی۔ قرآن خوانی اچ وݙی تعداد اچ معززین علاقہ سیاسی اتے سماجی کاروباری برادری، وکلاء اتے صحافی برادری دیاں شخصیات سودھا اہلیان علاقہ شرکت کیتی۔ شرکا مرحوم جام ایم ڈی گانگا کیتے دعائے مغفرت کیتی۔
