حکومت سرمایہ کاری اچ رکاوٹاں دور کرݨ دے اقدامات کریندی پئی اے، وزیراعظم محمد شہبازشریف

اسلام آباد۔27جنوری(اے پی پی)وزیراعظم محمد شہبازشریف آکھیے جو حکومت سرمایہ کاری اچ رکاوٹاں اتے مشکلات دور کرݨ دے اقدامات کریندی پئی اے، آندے کڄھ مہینے اچ بجلی دا ملھ ڳھٹسی، امید اے آئی ایم ایف دا اے پروگرام پاکستان دی تاریخ دا آخری پروگرام ہوسی۔

اے ڳالھ انہاں اسلام آباد اچ بین الاقوامی معیار دے نویں اتے سکس سٹار ہوٹل دی افتتاحی تقریب نال خطاب اچ آکھی۔ انہاں آکھیا جو پاکستان کوں اپݨے پیریں تے کھڑا کرݨ کیتے حکومت ݙینھ رات کم کریندی پئی اے، مہنگائی دی شرح 5 فیصد توں ڳھٹ ڳئی اے، بینکاں دا پالیسی ریٹ 13فیصد تے آ چکیے اتے ایندے اچ ٻئی ہک فیصد کمی متوقع اے، برآمدات ودھدیاں پن، آئی ٹی برآمدات اتے ترسیلات زر وی ودھدے پن، ملک دی اقتصادی شرح نمو دا سفر شروع تھیوݨ آلا اے، زراعت، آئی ٹی، صنعتاں اتے مائنزاینڈ منرلز دے شعبیاں اچ ساکوں ٻئی ترقی کرݨی اے۔ وزیراعظم آکھیے ڄے تئیں بجلی دی قیمت نئیں ڳھٹدی او تئیں صنعتاں، زراعت اتے برآمدات ترقی نئیں کر سڳدیاں۔ وزیراعظم آکھیا جو کاروبار سوکھا کرݨ کیتے کم تھیندا پئے، ایں بارے تیکھے اعلان کیتا ویسی، آئی ایم ایف دی مجبوری نا ہوندی تاں ٹیکس ریٹ 15 فیصد کر ݙیووں، حکومتی اخراجات ڳھٹاوݨ کیتے ڈائون اتے رائٹ سائزنگ دی پوری کوشش اے، کئی سرکاری ادارے بند کریندے پئے ہیں جو اخراجات ڳھٹن، پی آئی اے دی نجکاری دی کوشش اے، کوئٹہ، پشاور، کراچی سودھا ملکی سرمایہ کاراں کوں پی آئی اے دی نجکاری اچ حصہ ڳھنݨ دی دعوت ݙیندے پئے ہیں جو ادارے دا وقار بحال تھیوے، پی آئی اے دی شفاف بڈنگ نال نجکاری کریسوں، حکومت دا کم کاروبار کرݨ نئیں ٻھل کاروبار کوں سوکھ ݙیوݨ اتے نجی شعبے کوںو دھارا ݙیوݨ اے۔

وزیراعظم اسلام آباد چ سکس سٹار ہوٹل دا افتتاح خوش آئند قرار ݙیندے آکھیے جو اساں ساریاں دیاں کٹھیاں کوششاں نال پاکستان ہک عظیم قوت ٻݨسی