ضلع ہرنائی اچ آپریشن دے دوران 11دہشتگرد جہنم واصل ، دہشتگرداں دے ٻہوں سارے ٹھکاݨے وی تباہ کرݙتے ڳئن ، آئی ایس پی آر

راولپنڈی۔1فروری(اے پی پی) قلات اچ دہشت گردی دی ݙراوݨی کارروائی دے پس منظراچ پاک فوج ضلع ہرنائی اچ ھک آپریشن دے دوران 11دہشتگرداں کوں جہنم واصل کرݙتے تے دہشتگرداں دے ٻہوں سارے ٹھکاݨے وی تباہ کرݙتے ڳئن ۔ پاک فوج دے شعبہ تعلقات عامہ (آئی ایس پی آر) دی طرفوں پریس ریلیز موجب ضلع قلات اچ دہشت گردی دی ݙراوݨی کارروائی دے پس منظر اچ سکیورٹی فورسز دی طرفوں صوبے اچ ٻہوں سارے متعدد سینٹائزیشن آپریشنز کیتے ویندے پئن ۔یکم فروری 2025 کوں ضلع ہرنائی اچ کیتے ڳئے ھک آپریشن اچ پاک فوج دے نینگراں دہشت گرداں کوں مؤثر طریقے نال نشانہ بݨائے جیں دے نتیجے اچ 11دہشت گرداں کوں جہنم واصل کرݙتا ڳئے تے دہشت گرداں دے ٻہوں سارے ٹھکاݨے وی تباہ کرݙتے ڳئن ۔آئی ایس پی آر موجب ایں توں پہلے 31 جنوری اتے یکم فروری دی وچلی رات کوں ضلع قلات دے علاقے منگوچر اچ دہشت گرداں دی طرفوں روڈ بلاک کرݨ دی کوشش کوں کامیابی نال ناکام بݨیندے 12 دہشت گرداں کوں جہنم واصل کرݙتا ڳئے ۔بلوچستان اچ گزریل 24 گھنٹے دے دوران مختلف کارروائیاں اچ مجموعی طور تے 23 دہشت گرداں کوں جہنم واصل کیتا ڳئے ۔آئی ایس پی آرآکھیے دہشگردی دے مکاوݨ دیاں کارروائیاں اوں ویلھے تئیں جاری رہسن جݙاں تئیں ایں ݙراوݨے تے بزدلانہ فعل دے مرتکب اتے سہولت کاراں کوں انصاف دی کچاری اچ نی گھن آیا ویندا ۔پاکستان دی سکیورٹی فورسز قوم نال رل تے بلوچستان اتے پاکستان توں دہشت گردی دی لعنت دا صفایا کرݨ سانڳے پرعزم ہن۔