قلات اچ روڈ بلاک کرتے نشوم شہریاں کوں نشانہ بݨاوݨ تے بلوچستان دے پر امن ماحول کوں خراب کرݨ دی کوشش کرݨ آلے 12 دہشتگرد جہنم واصل ، آئی ایس پی آر

راولپنڈی ۔1فروری(اے پی پی) پاک فوج دے شعبہ تعلقات عامہ (آئی ایس پی آر) آکھیے دشمن قوتاں دی ایما تے قلات اچ روڈ بلاک کرتے نشوم شہریاں کوں نشانہ بݨاوݨ تے بلوچستان دے پر امن ماحول کوں خراب کرݨ دی کوشش کرݨ آلے 12 دہشتگرد جہنم واصل کرݙتے ڳئن ۔ آئی ایس پی آر توں جاری پریس ریلیز موجب 31 جنوری تے یکم فروری دی وچلی رات کوں بلوچستان دے ضلع قلات دے علاقے منگوچر اچ دہشت گرداں روڈ بلاک کرݨ دی کوشش کیتی ۔دشمن تے دشمن قوتاں دے ایماء تے دہشت گردی دی ایں بزدلانہ کارروائی دا مقصد بنیادی طور تے نشوم شہریاں کوں نشانہ بݨا تے بلوچستان دے پرامن ماحول کوں خراب کرݨ ہئی ۔سکیورٹی فورسزتے قانون نافذ کرݨ آلے اداریں کوں وختی طور تے متحرک کیتا ڳیا جنہاں دہشت گرداں دے مذموم عزائم کوں کامیابی نال ناکام بݨاݙتا تے مقامی آبادی دے تحفظ کوں یقینی بݨیندے ہوئیں 12 دہشت گرداں کوں جہنم واصل کیتا تاں جو آپریشن دے دوران دھرتی دے سپوتاں اتے ایف سی دے18 بہادر اہلکاراں بہادری نال لڑدے ہوئیں لازوال قربانی ݙتی تے شہادت کوں ڳل لاتے ۔آئی ایس پی آر آکھیے ایں حوالے نال سینیٹائزیشن آپریشنز کیتے ویندے پئن تے ایں ݙراکلے تے بزدلانہ فعل دے مرتکب، سہولت کار تے ایں دی حوصلہ افزائی کرݨ آلیں کوں انصاف دی کچاری اچ گھن آیا ویسی ۔پاکستان دی سکیورٹی فورسز قوم دے رلے بلوچستان دے امن، استحکام اتے ترقی کوں سبوتاژ کرݨ دیاں کوششاں کوں ناکام بݨاوݨ سانڳے پرعزم اے تے ساݙے بہادر سپاہیاں دی ایجھی قربانیاں ساݙے عزم کوں مزید تکڑا کریندن۔