سعودیہ اچ گرفتار بے گناہ خاندان رہا، وزیرداخلہ ملݨ گھر پڄ ڳن

لاہور۔2فروری(اے پی پی)ایئرپورٹ تے بیگ ٹیگ تبدیل کرتے بے گناہ خاندان کوں پھساوݨ آلے انٹرنیشنل ڈرگ گینگ دے 9 ملزمان کوں گرفتار کر ڳھدا ڳئے۔ وفاقی وزیر داخلہ و انسداد منشیات محسن نقوی دی خصوصی ہدایت تے اے این ایف دی ٹیم دی محنت نال سعودیہ اچ گرفتار بے گناہ خاندان رہا تھی ڳئے اتے خاندان دے 5 افراد واپس وطن پڄ ڳن۔ وفاقی وزیرداخلہ محسن نقوی رہا تھیوݨ آلے ٹٻر کوں ملݨ انہاں دے گھر ڳن اتے مبارک ݙتی۔

ڈی جی اینٹی نارکوٹکس فورس میجر جنرل عبدالمعید وی انہاں دے نال ہن۔ وزیر داخلہ آکھیا جو گرفتاری تے ݙکھ ہا، اے این ایف رہائی کیتے وݙی محنت کیتی اے اتے انٹرنیشنل گینگ کوں وی پکڑیے، ایں سانڳے سعودی حکومت دے وی مشکور ہیں، بے گناہ خاندان دی رہائی کیتے فوری اقدامات تے ڈی جی اے این ایف میجر جنرل عبدالمعید اتے انہاں دی ٹیم مبارکباد دی مستحق اے۔ ایں موقع تے متاثرہ خاندان وزیر داخلہ اتے اے این ایف ٹیم دا تعاون تے شکریہ ادا کیتے۔ ایں توں پہلے لاہور دی مرغزار کالونی دے علاقے ایل ڈی اے ایمپلائز سوسائٹی فیز ون دا ٹٻر، فرحانہ اکرم، ہارون علی، ملک عزیز، فوزیہ عزیز اتے ذکریا بیگم دا سعودی عرب ڈرگ مافیا عملے نال رل تے بیگ دا ٹیگ وٹائے جیندے تے پورے ٹٻر کوں 30 دسمبر کوں سعودی عرب اچ گرفتار کر ڳھدا ڳئے۔ معاملے تے اے این ایف انٹرنیشنل ڈرگ گینگ دے سرغنہ سودھا 9 ملزمان پکڑ تے ایں بارے سارے شواہد سعودی حکام کوں ݙتن اتے متاثرہ ٹٻر کوں رہا کروائے۔