پولیو کوں منڈھوں مکاوݨ حکومت دی اولین  ترجیح اے، ڈاکٹر مختار بھرتھ

اسلام آباد۔3فروری(اے پی پی) وزیراعظم دے کوآرڈینیٹر قومی صحت ڈاکٹر مختار بھرتھ آکھیے پولیو کوں منڈھوں مکاوݨ حکومت دی اولین ترجیح اے۔اے ڳالھ انہاں انسداد پولیو مہم دے آغاز تے آکھی ۔ انہاں آکھیے 2025 دی پہلی قومی انسداد پولیو مہم دا باقاعدہ آغاز تھی ڳئے ،پولیو مہم دے دوران پورے ملک اچ 4 کروڑ 50 لکھ توں ودھ ٻالاں کوں پولیو دے قطرے پلائے ویسن ۔ انہاں آکھیے پولیو ورکرز گھر گھر ونڄ تے آپݨی خدمات انجام ݙیسن ۔ڈاکٹر مختار بھرتھ والدین توں اپیل کیتی جو پولیو ورکرز دا بھرپور ساتھ  ݙیون تے آپݨے ٻالاں کوں پولیو دے قطرے ضرور پلاون ،پنج سال توں گھٹ عمر دے سارے ٻالاں کوں پولیو ویکسین پلواوݨ والدین دی قومی و اخلاقی ذمہ داری اے۔انہاں آکھیے وزیراعظم دی ذاتی دلچسپی پولیو مکاوݨ سانڳے حکومتی عزم کوں ظاہر کریندی اے ، پولیو پروگرام اتے توسیعی پروگرام حفاظتی ٹیکہ جات وچال ہم آہنگی کوں مزید تکرا کیتا ویندا پئے ۔ ملک اچ معمول دے حفاظتی ٹیکیں دی کوریج کوں چنڳاں کرݨ سانڳے موثر تے مربوط اقدامات کیتے ویندے پئن۔ ساݙا  بنیادی مقصد ٻالاں کوں پولیو سودھے ٻئی مہلک بیماریاں توں محفوظ رکھݨ  اے۔