پیکا ایکٹ دا مقصد کوڑیاں خبراں مکاوݨ تے سوشل میڈیا دے خطرے دا تدارک کرݨا اے ، کرپشن اداریں کوں ٻہوں ضیان پڄائے ، عطاءاللہ تارڑ

لاہور۔3فروری  (اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے پیکا ایکٹ دا مقصد کوڑیاں خبراں مکاوݨ تے سوشل میڈیا دے خطرے دا تدارک کرݨا اے ، صحافت دی آڑ اچ سوشل میڈیا کوں مادر پدر آزاد نی چھوڑیا ونڄ سڳدا ، کرپشن اداریں کوں ٻہوں ضیان پڄائے ، وزارت اطلاعات دے ماتحت اداریں کوں منافع بخش بݨاوݨ سانڳے سارے وسائل استعمال کیتے ویندے پئن ، صحافیاں دے مسئلے مکاوݨ اولین ترجیح اے ۔ اے ڳالھ انہاں اے پی پی ایمپلائز یونین پنجاب دے عہدیداران دی تقریب حلف برداری توں بحیثیت مہمان خصوصی خطاب کریندے آکھی ۔ ایں موقع تے مسلم لیگ (ن) دی رہنما بیگم ساجدہ فاروق تارڑ، کوآرڈینیٹر ہیریٹیج اینڈ کلچر فرح دیبا، ڈائریکٹر جنرل پی آئی ڈی لاہور شفقت عباس، انچارج اے پی پی  اردو نیوز سروس لاہور محمد عبداللہ، صدر یونین راناعبدالرحمان،صدراے پی پی ایمپلائیز  یونین اسلام آباد ملک خضر زمان،اے پی پی ایمپلائز یونین دے عہدیداران اتے سینئر صحافیاں سودھے وݙی تعداد اچ ٻئے لوک وی موجود ہن۔ وفاقی وزیر اطلاعات آکھیے اداریں دے ملازمین قومی اثاثہ ہن، ملازمین دی محنت، لگن اتے مہارتاں ہی ادارے دی کامیابی دا منڈھ ہوندن ۔ حکومت اداریں دی چنڳائی تے انہاں کوں منافع بخش بݨاوݨ سانڳے سارے وسائل استعمال کریندی پئی اے ۔ انہاں آکھیے پاکستان ٹیلی وژن، پاکستان براڈ کاسٹنگ کارپوریشن، ایسوسی ایٹڈ پریس آف پاکستان سودھے وزارت اطلاعات دے ماتحت ادارے عالمی سطح تے ملک دا مثبت تشخص اجاگر کرݨ اچ اہم کردار نبھیندے پئن۔ ریڈیو پاکستان توں پاکستان دی آزادی دا اعلان تھیا جیڑھا جو ھک وݙا اعزاز اے ۔ انہاں آکھیے پاکستان ٹیلی وژن، ریڈیو پاکستان تے اے پی پی قومی ادارے ہن جیڑھے عوام کوں معلومات ݙیوݨ دی بنیادی ذمہ واریاں دی ادائیگی دے نال نال ملک دی نظریاتی سرحداں دے محافظ وی ہن۔ وزارت اطلاعات دے ماتحت اداریں کوں جدید خطوط تے استوار کرݨ دی لوڑھ تے زور ݙیندے وفاقی وزیر آکھیے موجودہ دور جدید ٹیکنالوجی دا دور اے، اساکوں دنیا دا مقابلہ کرݨ سانڳے جدید ٹیکنالوجی کوں اپناوݨا ہوسی ۔ انہاں آکھیے وزارت دے سارے ماتحت اداریں اچ اصلاحات دا عمل جاری اے جیں دا مقصد اداریں کوں منافع بخش بݨاوݨ اے ۔ عطاءاللہ تارڑ آکھیے اداریں دی فلاح و بہبود ایں دے ملازمین نال جڑی ہوئی اے ، اداریں دی بہتری سانڳے کم کرݨ آلیں کوں ہمیشہ یاد رکھیا ویسی ۔ انہاں آکھیے کرپشن اداریں کوں ٻہوں ضیان پڄائے جیں پاروں اساکوں سخت اقدامات چاوݨے پئن ۔ منیجنگ ڈائریکٹر اے پی پی محمد عاصم کھچی دی ادارے توں کرپشن مکاوݨ دیاں کوششاں دی تعریف کریندے وفاقی وزیر آکھیے کرپشن دے کیساں کوں توڑ پڄایا ویسی ۔ پیکا ایکٹ تے ڳالھ کریندے وفاقی وزیر اطلاعات آکھیے پیکا ایکٹ دا مقصد صرف اتے صرف کوڑیاں خبراں مکاوݨ تے سوشل میڈیا دے خطرے دا تدارک کرݨا اے ۔ انہاں آکھیے ملک اچ سوشل میڈیا دے ذریعے کوڑا پروپیگنڈا کیتا ویندا پیا ہئی ، نقلی خبراں، ہراسانی، ٻالاں نال بدسلوکی جیھاں نامناسب خبراں کھنڈائیاں ویندیاں پیاں ہن ، ملکی سالمیت کوں ضیان پڄاوݨ دی کوششاں کیتیاں ویندیاں پیاں ہن، معیشت دے حوالے نال غیر یقینی صورتحال پیدا کرݨ، لوکاں کوں ہراساں کرݨ انہاں تے کوڑے فتوے لاوݨ ، توہین دا الزام لاتے واجب القتل قرار ݙیوݨ، تریمتاں کوں بلیک میل کرݨ جیھے ݙراوݨے جرائم سرانجام ݙتے ویندے پئے ہن جیں توں نفسیاتی مسئلے جنم گھندن انہاں آکھیے صحافت دی آڑ اچ سوشل میڈیا کوں آزاد نی چھوڑیا ونڄ سڳدا انہاں آکھیے پارلیمنٹ ضروری سمجھدے ہوئیں پیکا ایکٹ دی منظوری ݙتی جیں دا بنیادی مقصد سوشل میڈیا دے ذریعے پڄائے ونڄݨ آلے ضیان تے خطرے دا تدارک کرݨا اے۔ وفاقی وزیر آکھیے وختی ڈیجیٹل میڈیا پروٹیکشن اتھارٹی بݨائی ویسی جیں اچ نجی شعبے توں نامزدگیاں کیتیاں ویسن تے پریس کلب یا صحافتی تنظیماں نال جڑیے صحافیاں کوں ایں وچ رلایا ویسی۔ انہاں آکھیے  ٹربیونل اچ وی صحافیاں تے آئی ٹی پروفیشنل کوں رلایا ڳئے ، اپیل دے حوالے نال ٻہوں  صراحت  موجود اے، ٹربیونل تے لازم ہے جو 24 گھنٹے دے اندر سپیکنگ آرڈر پاس کرے اتے ایں آرڈر کوں رٹ پٹیشن دے ذریعے ہائی کورٹ اچ چیلنج کیتا ونڄ سڳسی ، رٹ پٹیشن اتےٹربیونل اچ پرائیویٹ ممبرز دا حق موجود اے اتے صحافی وی موجود ہن، سپریم کورٹ اچ اپیل دا حق وی موجود اے، حالی رولز بݨݨ ہن ایں اچ مشاورت دی گنجائش موجود اے، مشاورت اچ سارے سٹیک ہولڈرز کوں رلے گھن تے ٹرسوں ۔ وفاقی وزیر آکھیے سوشل میڈیا دے خطرے کوں روکݨ اے ھک چنڳاں اقدام اے ۔ پیکا ایکٹ اچ دنیا دے بہترین طریقیں کوں اپنایا ڳئے ایں ایکٹ اچ کوئی متنازعہ شق ہے تاں سامݨے گھن آئی ونڄے اساں ایں تے ڳالھ کرݨ سانڳے تیار ہیسے ۔ ایں توں پہلے وفاقی وزیر اطلاعات و نشریات عطاءاللہ تارڑ ریڈیو پاکستان آفسں لاہور پڄے تاں انہاں دا پرتپاک استقبال کیتا ڳیا تے انہاں تے پھُل دیاں پتیاں نچھاور کیتیاں ڳیاں ۔ چھیکڑ اچ وفاقی وزیر اطلاعات اے پی پی ایمپلائز یونین پنجاب دے نویں منتخب عہدیداران توں حلف ڳھدا ، انھاں کوں مبارخ ݙتی تے آکھیے ایں ادارے توں تساڈے ٻالاں دا رزق جڑیا ہویا اے میکوں امیدے اے جو یونین ادارے دی بہتری سانڳے مزید محنت اتے لڳن نال کم جاری رکھیسی ۔ وفاقی وزیر اطلاعات اے پی پی دے ملازمین کوں پیش آندے مسئلے مکاوݨ دا وی یقین ݙیوائے ۔ تقریب دے چھیکڑ اچ شرکا کوں شیلڈز ݙتیاں ڳئن۔