دہشتگرد بلوچستان دے امن، ترقی و خوشحالی دے دشمن ہن،شر پسند عناصر دی بزدلانہ کارروائیاں صوبے دی ترقی دے عزم کوں جھکا نی کرسڳدیاں، سی پیک توڑپڄاوݨ تے تکھے کم جاری اے ، وزیراعظم شہبازشریف

کوئٹہ۔3فروری (اے پی پی) وزیرِ اعظم محمد شہباز شریف آکھیے دہشتگرد بلوچستان دے امن، ترقی و خوشحالی دے دشمن ہن،شر پسند عناصر دی بزدلانہ کارروائیاں صوبے دی ترقی دے عزم کوں جھکا نی کرسڳدیاں، سی پیک توڑپڄاوݨ تے تکھے کم جاری اے ،گوادر بندرگاہ وسطی ایشیاو جنوب مشرقی ایشیا تے باقی دنیا وچال پاکستان کوں رابطے دا اہم ذریعہ  بݨاوݨ اچ کلیدی کردار ادا کریسی۔ وزیراعظم دفتر دے میڈیا ونگ موجب وزیراعظم بلوچستان اچ امن و امان دی صورتحال تے جائزہ اجلاس دی صدارت کریندے اے ڳالھ آکھی ۔ اجلاس اچ صوبے دی امن و امان دی صورتحال، ترقیاتی منصوبیں تے پیشرفت اتے ٻئے اہم صوبائی امور تے بریفنگ ݙتی ڳئی ۔ اجلاس اچ نائب وزیرِاعظم و وزیرِ خارجہ اسحاق ڈار، وزیرِ دفاع خواجہ آصف، وفاقی وزیرِ اطلاعات و نشریات عطاء اللہ تارڑ، وفاقی وزیرِ بجلی اویس لغاری، رکن قومی اسمبلی جمال کاکڑ، گورنر بلوچستان شیخ جعفر خان مندوخیل، وزیرِاعلی بلوچستان سرفراز بگٹی، صوبائی وزیر محمد سلیم کھوسہ اتے متعلقہ اعلیٰ حکام شرکت کیتی۔ وزیراعظم آکھیے دہشتگرد بلوچستان دے امن، ترقی و خوشحالی دے دشمن ہن ۔ دہشتگرد نی چاہندے جو بلوچستان دے لوک خوشحال، نینگر تعلیم یافتہ تے برسر روزگار تھیون ۔ بلوچستان دی ترقی دا سفر جاری رہسی ۔ وزیراعظم آکھیےشر پسند عناصر دی بزدلانہ کارروائیاں حکومت دے بلوچستان دی ترقی دے عزم کوں جھکا نی کرسڳدیاں ۔ بلوچستان دی ترقی حکومت دی اولین ترجیحات اچ شامل اے۔ بلوچستان اچ صحت و تعلیم دی معیاری سہولتاں، روزگار دے موقع ݙیوݨ سانڳے اقدامات کریندے پیوں ۔ ہݨے ہی چین اچ زرعی شعبے دی جدید تربیت سانڳے بھیڄے ونڄݨ آلے طالبیں اچ بلوچستان دے طالبیں دا خصوصی کوٹہ رکھیا ڳئے۔ وزیراعظم آکھیے یوتھ پروگرام، وزیراعظم لیپ ٹاپ سکیم دے ذریعے بلوچستان دے طالبیں کوں بااختیار بݨایا ویندا پئے انہاں آکھیے بلوچستان اچ زراعت دی ترقی سانڳے زرعی ٹیوب ویلاں کوں شمسی توانائی تے منتقل کیتا ڳئے ۔ اللہ دے فضل و کرم نال سی پیک پورا کرݨ تے کم تکھے جاری رہسی ۔ گوادر ایئرپورٹ تے پروازاں دا سلسلہ شروع تھی چکیے ۔ گوادر بندرگاہ وسطی ایشیا و جنوب مشرقی ایشیا تے باقی دنیا وچال پاکستان کوں ھک اہم رابطہ بݨاوݨ اچ کلیدی کردار نبھیسی۔  وزیرِاعظم آکھیے عسکری قیادت، سپہ سالار تے افواج پاکستان حکومت نال رل تے پرامن بلوچستان کیتے ݙینھ رات کوشاں ہن۔ میں سودھے پوری قوم بلوچستان دے امن کیتے کوشاں سکیورٹی فورسز، پولیس اتے ضلعی انتظامیہ تے ٻئے اداریں کوں خراج تحسین پیش کریندی اے۔