توانائی، ٹیکسیشن، ایس او ایز اتے پبلک فنانس سودھے مختلف شعبیں اچ ڈھانچہ جاتی اصلاحات داعمل جاری اے ،وفاقی وزیرخزانہ

اسلام آباد۔3فروری(اے پی پی) وفاقی وزیر خزانہ و محصولات سینیٹر محمد اور نگزیب آکھیے توانائی،ٹیکسیشن،ایس اوایز اتے پبلک فنانس سودھے مختلف شعبیں اچ ڈھانچہ جاتی اصلاحات داعمل جاری اے،تنخواہ دار اتے مینوفیکچرنگ طبقے تے ٹیکساں دا ٻوجھ غیرمتناسب اے، زرعی انکم ٹیکس دے حوالے نال پیشرفت تھئی اے۔ اسلام آباد چیمبر اچ میڈیا نال ڳالھ مہاڑ اچ وزیر خزانہ آکھیے محصولات ودھاوݨ سانڳے ٹیکنالوجی سودھے مختلف شعبیں اچ استعداد کار کوں بہتر بݨاوݨا اے۔ انہاں آکھیے توانائی،ٹیکسیشن،ایس او ایز اتے پبلک فنانس سودھے مختلف شعبیں اچ ڈھانچہ جاتی اصلاحات داعمل جاری اے،ایں دے تحت مقداری اتے ڈھانچہ جاتی بنچ مارک تھیندن ،ڈھانچہ جاتی بنچ مارک دے ضمن اچ قومی مالیاتی معاہدے تے دستخط تھی چکئن ،خیبرپختونخوا دے بعد سندھ وی زرعی انکم ٹیکس دے حوالے نال پیشرفت کیتی اے ،بلوچستان وی ایں ضمن اچ اقدامات کریسی ۔انہاں آکھیے کتھاؤں تاں اساکوں شروع کرݨا ہوسی ،تنخواہ دار اتے مینوفیکچرنگ طبقے تے ٹیکساں دا ٻوجھ غیرمتناسب اے،جے ٹیکس دی بنیاد اچ وسعت گھن آئی ونڄے تاں اے ٻوجھ مساوی تھی ویسی ، زرعی انکم ٹیکس دے حوالے نال پیشرفت چنڳی اے۔انہاں آکھیے اساکوں امید اے جو بین الاقوامی مالیاتی فنڈ دے نال چھی مہینے دے جائزے اچ پاکستان چنڳی حالت اچ ہوسی ۔وزیرخزانہ آکھیے بجٹ سازی داعمل شروع تھی چکے ، تاجراں اتے سرمایہ کاراں دیاں تجویزاں ڳھدیاں ویندیاں پئن ، 7فروری تئیں سارے چیمبرز اتے وزارتاں تے ڈویژنز توں تجویزاں تے سفارشات منڳیاں ڳئن ۔ انہاں آکھیے او خودمختلف چیمبرزاچ ویسن تے ساریاں تجویزاں گھنسن ، پاکستان ایں ویلھے آئی ایم ایف نال پروگرام وچ اے ایں پروگرام موجب انھاں تجاویزاں تے شفارشاں دا جائزہ ڳھدا ویسی ۔