یوم یکجہتی کشمیرصبحائیں بھرپور طریقے نال منایا ویسی

اسلام آباد۔4فروری(اے پی پی) پاکستان تے آزاد کشمیر دے عوام بھارت دے غیر قانونی زیر تسلط جموں وکشمیر دے عوام نال اظہار یکجہتی سانڳے سویلے ٻدھ دے ݙینھ یوم یکجہتی کشمیر منیسن۔ ایں موقع تے پاکستان کوں جموں وکشمیر نال رلاوݨ آلیاں پُلاں تے انسانی ہتھاں دی زنجیراں بݨائیاں ویسن ۔ کشمیرمیڈیا سروس موجب پاکستان دی حکومت اتے عوام ہر سال 5فروری کوں یوم یکجہتی کشمیر منا تے مقبوضہ کشمیر دے عوام نال اظہار یکجہتی اتے انہاں دے حق تے مبنی جدوجہد آزادی دی غیر متزلزل حمایت دا اعادہ کریندن ۔ ایں موقع تے پاکستانی قوم دی طرفوں اقوام متحدہ دی قرارداداں موجب کشمیریاں دے ناقابل تنسیخ حق خودارادیت دی منصفانہ جدوجہد دی بھرپور حمایت دا اظہار کیتا ویندے ۔ مظلوم کشمیری عوام دی حالت زار کوں نشابر کرݨ تے عالمی برادری کوں پراݨے جھیڑے دے حل دے حوالے نال ایندیاں ذمہ واریاں یاد ݙیواوݨ سانڳے ایں ݙینھ کوں مناوݨ دیاں تیاریاں مکمل کرڳھدیاں ڳئن۔ایں موقع تے بھارتی قابض فورسز دے ہتھوں انسانی حقوق دی سنگین خلاف ورزیاں اتے نہتے کشمیریاں دے خلاف جاری ظلم دے پاسے عالمی برادری دی توجہ مبذول کراوݨ سانڳے آزاد کشمیر سودھے پورے ملک اچ ریلیاں، جلسے اتے سیمینارز دا انعقاد کیتا ویسیا۔ٻاہرلے ملک سارے پاکستانی مشنزاچ سیمینارزاتےتصویری نمائشاں دااہتمام کیتا ویسی تاں جو دنیا دی توجہ مظلوم کشمیریاں دی حالت زار دے پساے کرائی ونڄ سڳے۔کوہالہ، ہولاڑ، برار کوٹ، ڈھلکوٹ، آزاد پتن، دھان گلی، منگلا سودھے پاکستان کوں کشمیر نال رلاوݨ آلیاں پُلاں تےسویلے 10 وڄے انسانی ہتھاں دیاں زنجیراں بݨائیاں ویسن تے بھارتی قابض افواج دے خلاف کشمیری عوام دی جدوجہد دی حمایت دا اظہار کریسن ۔ پاکستان یوم یکجہتی کشمیر 1975 توں منیندا پئے۔ ایں ݙینھ پاکستان تے آزاد جموں و کشمیر دے عوام اپݨے حقوق اتے آزادی سانڳے لڑݨ آلے مظلوم کشمیریاں نال اظہاریکجہتی کریندن ۔ شہدائے کشمیر کوں خراج عقیدت پیش کرݨ سانڳے سویلے 10 وڄے ھک منٹ سانڳے چُپ کیتی ویسی۔