گوادر دی بندرگاہ دے حوالے نال بہترین مارکیٹنگ تے آگاہی دی حکمت عملی بݨائی ونڄے، وزیراعظم محمد شہباز شریف دی وفاقی کابینہ اجلاس اچ ہدایت

اسلام آباد۔4فروری(اے پی پی) وزیراعظم محمد شہباز شریف گوادر دی بندرگاہ کوں کمرشل بنیاداں تے آپریشنلائز کرݨ سانڳے وختی اقدامات دی ہدایت کریندے آکھیے گوادر دی بندرگاہ دے حوالے نال بہترین مارکیٹنگ تے آگاہی دی حکمت عملی بݨائی ونڄے ۔ وزیراعظم دفتر میڈیا ونگ توں جاری بیان موجب وزیراعظم محمد شہباز شریف دی صدارت اچ وفاقی کابینہ دا اجلاس تھیا ۔ وفاقی کابینہ کوں وفاقی وزیر منصوبہ بندی احسن اقبال دی طرفوں گوادر دی بندرگاہ تے تفصیلی بریفنگ ݙتی ڳئی ۔ اجلاس کوں ݙسایا ڳئے جو گوادر پورٹ 50،000 ڈیڈویٹ ٹنیج تئیں دے جہازاں سانڳے خلیج فارس تئیں گھٹ خرچ اتے گھٹ ویلھے اچ رسائی مہیا کرݨ تے خلیجی ملکاں تئیں ٹرانس شپمنٹ ݙیوݨ دی صلاحیت رکھیندی اے ۔ ایں توں انڄ اے بندرگاہ  بلوچستان دے کان کنی اتے ایکواکلچر دے شعبیں دی ترقی اچ اہم کردار ادا کریسی۔ ایں بندرگاہ تں چین دے مغربی علاقے اتے وسطی ایشیائی ریاستاں فیدہ چاسڳسن ۔اجلاس کوں مزید ݙسایا ڳئے جوگوادر فری زون کوں سارے وفاقی، صوبائی تے لوکل ٹیکساں توں مستثنیٰ قرارݙتا ڳئے جݙاں جو گوادر فری زون دے رولز وی بݨائے ڳئن۔ اجلاس کوں مزید ݙسایا ڳئے 2018 توں 2022 دے دوران گوادر پورٹ دی ڈریجنگ دے حوالے نال مجرمانہ غفلت ورتی ڳئی جیں توں بندرگاہ دی گہرائی شدید متاثر تھئی تاں جو 2022-23 اچ گوادر پورٹ دی ڈریجنگ دا کم مکمل کر ڳھدا ڳئے جیں دے بعد گوادر پورٹ دی گہرائی بحال تھی چکی اے ۔گوادر پورٹ تے ساریاں یوٹیلیٹیز سہولتاں ݙتیاں ڳئن ۔ اجلاس کوں ݙسایا ڳئے گوادر اچ عوامی فلاح دی کئی منصوبے وی قائم کیتے ڳئن جنہاں اچ پاک- چین فرینڈ شپ اسپتال ، گوادر انسٹی ٹیوٹ آف ٹیکنیکل ایجوکیشن، پاک-چین پرائمری سکول، گوادر لائیو لی ہڈ پراجیکٹ، گوادر فشریز پراسسینگ اینڈ ایکسپورٹ زون اتے گوادر سولر پارک وغیرہ شامل ہن۔ اجلاس کوں ݙسایا ڳئے حکومت گوادر کوں پاکستان ریلویز دی مین لائین M-4  نال رلاوݨ سانڳے ریل لنک تے کم کریندی پئی اے ۔ گوادر توں کوئٹہ شاہراہ 2018ء  اچ مکمل کیتی ڳئی ہئی جیں توں تربت، ہوشاب اتے پنجگور سودھے ٻئے علاقے وی فیدہ چیندے پئن ۔ ایں توں انڄ موٹر وے ایم 8 (گوادر-ہوشاب -رتو ڈیرو ) دے بقیہ حصے دی تعمیر وی منصوبے دا حصہ اے تاں جو گوادر کوں سکھر نال رلایا ونڄ سڳے ۔ گوادرتے کوئٹہ دا رابطہ مزید بہتر بݨاوݨ سانڳے نوکنڈی توں ماشخیل تئیں سڑک زیر تعمیر اے جݙاں جو ماشخیل توں پنجگور تئیں سڑک تے کم دا آغاز وختی کیتا ویندا پئے ۔ گوادر ایسٹ بے ایکسپریس وے دی تعمیر دا تکھے کم مکمل کیتا ویندا پئے ۔ گوادر سیف سٹی دے حوالے نال بلوچستان حکومت نال رل تے کم کیتا ویندا پئے ۔وفاقی وزیر گوادر پورٹ تے کارگو انسپکشن دی سہولت کوں جدید خطوط تے استوار کرݨ تے مصنوعی ذہانت  دے استعمال دی تجویزاں پیش کیتیاں ۔ وزیر اعظم بریفنگ دی تعریف کیتی ۔ ایں موقع تے وزیراعظم گوادر پورٹ کوں کمرشل بنیاداں تے آپریشنلائز کرݨ سانڳے وختی اقدامات دی ہدایت کیتی ۔ انہاں گوادر پورٹ دی آپریشنلائزیشن دے حوالےنال وفاقی وزیر منصوبہ بندی احسن اقبال دی صدارت  اچ کمیٹی بݨاوݨ دی ہدایت کیتی جیڑھا جو گوادر پورٹ کوں ھک جدید تے مکمل فعال بندرگاہ بݨاوݨ دے حوالے نال سارے سٹیک ہولڈرز نال رل تے کم کریسی ۔ وزیراعظم گوادر پورٹ دی افادیت توں آگاہی  سانڳے انٹرنیشنل کانفرنس دا انعقاد کرݨ دے احکامات جاری کیتے ۔ انہاں آکھیے گوادر پورٹ دے حوالے نال بہترین مارکیٹنگ اتے  آگاہی دی حکمت عملی بݨائی ونڄے تے گوادر پورٹ دے حوالے نال سفارتی کوششاں تکھیاں کیتیاں ونڄن ۔ وزیر اعظم گوادر پورٹ توں کیتی ونڄݨ آلی درآمدات اتے بر آمدات دی تفصیل وی منگ ڳھدی