آرمی چیف جنرل سید عاصم منیر دی صدارت اچ 267ویں کور کمانڈرز کانفرنس

راولپنڈی۔4فروری(اے پی پی) آرمی چیف جنرل سید عاصم منیردی صدارت اچ  267ویں کور کمانڈرز کانفرنس جی ایچ کیو راولپنڈی اچ تھئی ۔شرکا مادر وطن دے امن و استحکام سانڳے شہدائے افواج پاکستان، قانون نافذ کرݨ آلے اداریں تے پاکستانی شہریاں دی لازوال قربانیاں کوں زبردست خراج عقیدت پیش کیتے۔ فورم پیش آندے خطریں دا مفصل جائزہ گھندے ہوئیں علاقائی اتے داخلی سلامتی دے منظر نامے تے روشنی پاتی ۔ آئی ایس پی آر موجب شرکا کانفرنس لائن آف کنٹرول (ایل او سی) تے ورکنگ بائونڈری نال موجودہ صورتحال تے ڳالھ مہاڑ کیتی ۔فورم یوم یکجہتی کشمیر (5 فروری 2025ء) دے موقع تے کشمیر دے پرعزم لوکاں نال اظہار یکجہتی کیتے۔ فورم بھارت دی طرفوں غیر قانونی طور تے مقبوضہ جموں و کشمیر اچ انسانی حقوق دی مسلسل خلاف ورزیاں دی شدید مذمت کیتی تے انہاں کوں خطے دے امن تے استحکام سانڳے ھک سنگین خطرہ قرار ݙتے۔شرکا کانفرنس اقوام متحدہ دی سلامتی کونسل دی متعلقہ قرارداداں دے مطابق کشمیری عوام دے حق خودارادیت سانڳے انہاں دی جدوجہد اچ پاکستان دی غیر متزلزل حمایت دا اعادہ کیتے۔ شرکا اقوام متحدہ دی سلامتی کونسل دی متعلقہ قرارداداں دی مسلسل خلاف ورزیاں نال نبݨݨ سانڳے بین الاقوامی تعاون دی اہمیت تے وی زور ݙتا ۔فورم بھارتی فوجی قیادت دے اڄوکے عاقبت نا اندیش اتے اشتعال انگیز بیانات دا وی سخت نوٹس ڳھدا تے انہاں کوں غیر ذمہ دارانہ اتے علاقائی استحکام سانڳے نقصان دہ قرارݙتا ۔فورم توں خطاب کریندے آرمی چیف سید عاصم منیرنشان امتیاز(ملٹری)  آکھیے پاکستان آرمی ملکی خودمختاری اتے سالمیت دے دفاع سانڳے پوری طرح تیار اے ۔ بھارتی فوج دے کھوکھلے بیانات انھاں دی ودھدی ہوئی مایوسی دی نشاندہی کریندن ، ایں قسم دے  بیانات اپݨے عوام اتے عالمی برادری دی توجہ بھارت دے اندرلے خلفشار اتے انہاں دی انسانی حقوق دی کھلی خلاف ورزیاں توں توجہ ہٹاوݨ سانڳے ہن،کہیں وی مہم جوئی دا  پاکستان مکمل طاقت نال جواب ݙیسی ، انشاء اللہ۔فورم فتنہ الخوارج دی طرفوں پاکستان دے خلاف دہشت گردی دی کارروائیاں سانڳے افغان سرزمین دے مسلسل استعمال تے گہری تشویش کیتی ۔  فورم ایں ڳالھ دی لوڑھ تے زور ݙتے جو عبوری افغان حکومت فتنہ الخوارج دی موجودگی توں انکار دی بجائے ایں دے خلاف ٹھوس تے عملی اقدامات کرے ۔فورم واضح کیتے جو افغانستان اتے فتنہ الخوارج دے ضمن اچ جاری شدہ سارے ضروری اقدامات اتے حکمت عملی کوں جاری رکھیا ویسی جیڑھے پاکستان اتے ایں دے عوام دے تحفظ کوں یقینی بݨیندن ۔فورم بلوچستان اچ عوام تے مرکوز سماجی و اقتصادی ترقی دے اقدامات کوں تکھا کرݨ دی لوڑھ تے وی زور ݙتا تاں جو احساس ِ محرومی دے آپوں گھڑیے بیانیے دی نفی کیتی ونڄ سڳے ۔ فورم ایں ڳالھ دا اعادہ کیتے جو کہیں کوں وی بلوچستان اچ  امن خراب کرݨ دی اجازت نہ ݙتی ویسی ۔ فورم آکھیے غیر ملکی پشت پناہی کرݨ آلی پراکسیز دی بلوچستان دے نینگراں کوں گمراہ کرݨ تے انتہا پسندی تے مائل کرݨ دے مذموم عزائم کوں بلوچستان دے عوام دی غیر متزلزل حمایت نال ناکام بݨایا ویسی ۔انشاء اللہ ساری فارمیشناں دی آپریشنل تیاریاں دی تعریف کریندے آرمی چیف مشن تے مبنی تربیت، بہتر فوجی تعاون، روایتی اتے انسداد دہشت گردی دی مد اچ مشترکہ مشقاں دے انعقاد دی اہمیت تے زور ݙتاکانفرنس دے چھیکڑ تے آرمی چیف ایں ڳالھ دا اعادہ کیتے جو عسکری قیادت قوم کوں پیش آندے کثیرالجہتی چیلنجز نال مکمل طور تے آگاہ اے۔عسکری قیادت پاکستان دی قابل فخر عوام دی بھرپور حمایت نال آپݨی آئینی ذمہ داریاں کوں پورا کرݨ سانڳے پرعزم اے۔