حکومت اوورسیز پاکستانیاں دے مسئلیں دے حل سانڳے کوئی کسر نہ چھوڑیسی ، ٻاہرلے ملک پاکستانیاں دے گرین چینل کوں بحال کریسوں ،وزیراعظم محمد شہباز شریف

اسلام آباد۔4فروری(اے پی پی) وزیراعظم محمد شہباز شریف ٻاہرلے ملک رہݨ آلے پاکستانیاں کوں ملک دا عظیم سفیر قرار ݙیندے آکھیے حکومت اوورسیز پاکستانیاں دے مسئلے حل کرݨ سانڳے کوئی کسر نہ چھوڑیسی ، آپ دے عزم اتے محنت پاروں ترسیلات زر اچ تقریباً 30 فیصد ودھارا تھئے ،ٻاہرلے ملک پاکستانیاں دے گرین چینل کوں بحال کریسوں ،ماضی دی حکومت دی غلط پالیسیاں پاروں دہشت گردی دے ناسور ول سرچاتے ،اساں دہشت گردی کوں منڈھوں مکاتے ملک کوں امن دا گہوارہ بݨیسوں ۔ انہاں اے ڳالھ اوور سیز پاکستانیز گلوبل فائونڈیشن دے کنونشن توں خطاب کریندے آکھی ۔ ایں موقع تے وفاقی وزیر خزانہ محمد اورنگزیب، وفاقی وزیر مواصلات عبدالعلیم خان ،وفاقی وزیر اطلاعات و نشریات عطاء اللہ تارڑ، وفاقی وزیر مذہبی امور چوہدری سالک حسین اتے وزیر مملکت خزانہ علی پرویز ملک وی موجود ہن۔وزیراعظم آکھیے ٻاہرلے ملک رہݨ آلے پاکستانی ملک دے عظیم سفیر ہن ، اوورسیز پاکستانیاں دا ملک اچ خیر مقدم کریندوں ، آپ ہر شعبے اچ آپݨی ݙینھ رات محنت نال ملک دا ناں روشن کریندے پئن ،میں پاکستان دی حکومت اتے پاکستان دے 24 کروڑ عوام تساڈی عظمت کوں سلام پیش کریندن،ٻاہرلے ملک توں تربیت گھن تے تساں ملک سانڳے بہترین خدمات سرانجام ݙیندو ، تساڈے تجربے توں ملک و قوم کوں فیدہ تھیندے ۔ وزیراعظم آکھیے تساڈے عزم اتے محنت پاروں ترسیلات زر اچ تقریباً 30 فیصد ودھارا تھئے ، ترسیلات زر اچ ودھارے توں زر مبادلہ دے ذخیرے مستحکم تھئن،تساں آپݨے ملک اچ جیڑھی سرمایہ کاری کریندو ایں توں ملکی معیشت کوں فیدہ تھیندے تے جݙاں تساں جائیداداں گھندو تاں ایں توں پراپرٹی دے کاروبار کوں ودھارا ملدے ۔ وزیراعظم آکھیے وزارت اعلیٰ دے دور اچ اساں پنجاب اچ ٻاہرلے ملک رہݨ آلے پاکستانیاں دے مسئلے حل کرݨ سانڳے موثر اقدامات کیتے ہن، ھک ادارہ  بݨایا ہئی تے قبضہ گروپاں دے خلاف کارروائی یقینی بݨائی ہئی ۔  وزیراعظم آکھیے او ادارہ پنجاب اچ وزیراعلی مریم نواز دی نگرانی اچ بہترین کم کریندا پئے ، امید اے جو ایں وچ مزید بہتری آسی ۔وزیراعظم آکھیے ٻاہرلے ملک رہݨ آلے پاکستانیاں دے مسئلے مکاوݨ اچ کوئی کسر نہ چھوڑیسوں تساکوں تساڈا حق ݙویسوں ، تساڈیاں جائیداداں کوں محفوظ بݨاوݨ سانڳے اقدامات کیتے ڳئن ۔ وزیراعظم آکھیے تساں جیڑھے معاملات چاتن انہاں کوں حل کیتا ویسی۔انہاں آکھیے گرین چینل  سابق وزیراعظم نواز شریف دا وݙا کارنامہ ہئی ایں کوں وختی بحال کیتا ویسی ، امید اے ایں اچ ٻاہرلے ملک رہݨ آلے پاکستانی وی پوری طرح ساݙا ہتھ ونڈیسن ۔وزیر اعظم آکھیے ٻاہرلے ملک رہݨ آلے پاکستانیاں نال یوتھ فیسٹیول متعلق تجویز دا خیر مقدم کریندوں ، وفاقی وزیر اطلاعات و نشریات کوں آکھساں جو ایں حوالے نال متعلقہ وزراء اتے او پی ایف نال رل تے ھک پلان بݨاون تے اڳلے کجھ مہینے اچ ایں دا انعقاد تھیوݨا چاہیدے ۔وزیراعظم آکھیے ملک اچ قیام امن سانڳے پاک فوج دے بہادر افسران اتے نینگر قربانیاں ݙیندے پئن ، 2018ء تئیں ملک اچ دہشت گردی منڈھوں مک ڳئی ہئی لیکن ماضی دی حکومت دی غلط پالیسیاں توں ایں ناسور ول سرچاتے ، دہشت گردی دے خلاف جنگ اچ 80 ہزار پاکستانیاں اپݨی جاناں دا نذرانہ پیش کیتا، انھاں اچ عام شہری، ڈاکٹرز، انجینئرز  دے نال نال افواج پاکستان دے دلیر افسران، جوان تے انہاں دے ٻال وی شامل ہن ۔ ول ونڄ تے دہشت گردی منڈھوں مکی لیکن بدقسمتی نال کجھ سال پہلے ھک حکومت انہاں کوں ول پاکستان آوݨ ݙتا ایں توں وݙی پاکستان دشمنی ٻئی کوئی نی تھی سڳدی ، کل ہی کوئٹہ دا دورہ کیتے ، ایں توں ݙو ݙینھ پہلے پاک فوج دے سپہ سالار جنرل عاصم منیر اتھاں تشریف گھن ڳئے ،23 دہشت گرداں کوں جہنم واصل کیتا ڳئے تے ایں دے نال 18 بہادر نینگر شہید تھئن زخمیاں نال میݙی ملاقات تھئی انہاں دے حوصلے اچے ہن اے او قربانیاں دی لازوال داستان ،افواج پاکستان دے افسران تے نینگراں تے پاکستان دیاں ماواں ،بھیݨاں دھیڑیں تے بزرگاں قربانیاں ݙتن میں تساکوں یقین ݙوینداں جو انہاں عظیم قربانیاں دے نتیجے اچ اے دہشت گردی ول مک ویسی تے ہمیشہ ہمیشہ سانڳے دفن تھیسی تے اے دھرتی انشاءاللہ محفوظ ہوسی کیوں جو ایں دےپچھوں ساݙے باوردی نینگر تے افسراں دیاں قربانیاں ہن انہاں دیاں قربانیاں ضائع نہ ویسن تے اے قربانیاں رنگ گھن آسن اساں دہشت گردی منڈھوں مکا تے ملک کوں امن دا گہوارہ بݨیسوں اساں گزریل سال تقریب کیتی ہئی جیں اچ پاکستان اچ ساریں توں وݙے سرمایہ کار ، ایکسپورٹر تے ساریں توں وݙے ٹیکس دہندگان کوں ایوارڈز ݙتے ہن تے انہاں کوں سفیر عمومی بݨایا ہئی،وفاقی وزیر اوورسیز  پاکستانیز اتے چیئرمین او پی ایف کوں آکھساں جو دیار غیراچ پاکستانیاں دی ھک کیٹیگری  بݨائی ونڄے ، ہر سال دنیا دے مختلف حصیں توں ٻاہرلے ملک رہݨ آلے پاکستانیاں کوں سفیر عمومی بݨیسوں تے انہاں کوں بلیو پاسپورٹ وی ݙیسوں وفاقی وزیر اوورسیز پاکستانیز چوہدری سالک حسین آکھیے ٻاہرلے ملک رہݨ آلے پاکستانیاں دا ملکی معیشت اچ اہم کردار اے انہاں دےمسئلے مکائے ویسن ، کنونشن دے انعقاد تے منتظمین کوں مبارخ ݙینداں ۔اوورسیز پاکستانی گلوبل فائونڈیشن دے چیئرمین ظہیر اخترمہر آکھیے دنیا دے 20 ملکاں توں پاکستانی اتھاں موجود ہن ۔اوورسیز پاکستانیز یقین ݙویندن جو اساں ریاست پاکستان دے رلے کھڑوں تے کھڑے رہسوں ساݙا نعرہ اے پہلے ریاست ول سیاست۔انہاں آکھیے دنیا دے مختلف ملکاں توں اے پاکستانی اپݨے ملک دے سفیر ہن  اساں آپݨے ملک تے آپݨے اداریں نال رل تے کم کریسوں ۔ ٻاہرلے ملک پاکستانی وزیراعظم ہائوس اچ سݙݨ تے بے حد خوش ہیسے۔ ٻاہرلے ملک رہݨ آلے پاکستانی تساڈی ٹیم ہن،سوشل میڈیا تے کوڑیاں خبراں دا ڈٹ تے مقابلہ کریسں تساں ٻاہرلے ملک رہݨ آلے پاکستانیاں تے آپݨا در کھول تے ھک تاریخ رقمکیتی اے اساں تساں تے سارے اداریں دے ممنون ہیسے ، دہشت گردی دے خلاف جنگ اچ پاکستانیاں ساریں توں ودھ قربانیاں ݙتن ساݙے شہداء ساݙے ہیروز ہن انہاں دیاں قربانیاں نال ساݙا مستقبل محفوظ تھئے  اساں انہاں دیاں قربانیاں کوں نہ بُھلسوں۔