فلسطین اتے مقبوضہ جموں و کشمیر اچ انسانیت دے خلاف جرائم کرݨ آلیاں کون انصاف دی کچہری اچ ڳھن آوݨا ہوسی، وزیراعظم محمد شہباز شریف دا آزاد کشمیر قانون ساز اسمبلی نال خطاب

مظفر آباد ۔5فروری(اے پی پی)وزیراعظم محمد شہباز شریف آکھیے جو فلسطین اتے مقبوضہ جموں و کشمیر اچ انسانیت دے خلاف جرائم کرݨ آلیاں کون انصاف دی کچہری اچ ڳھن آوݨا ہوسی، بھارت اتے خطے دے بہترین مفاد اچ ایہو اے جو او 5 اگست 2019ء دی سوچ توں ٻاھرو نکلے اتے اقوام متحدہ دی سلامتی کونسل دی منظور کیتیاں قرارداداں تے عمل، کشمیریاں اتے ڄڳ نال کیتے اپݨے وعدے پورے کریندے تنازعہ جموں و کشمیر تے بامعنی اتے نتیجہ خیز مذاکرات کرے۔ اے ڳالھ انہاں یوم یکجہتی کشمیر تے دورہ آزاد کشمیر ویلھے آزاد جموں و کشمیر قانون ساز اسمبلی دے خصوصی اجلاس نال خطاب اچ آکھی۔

انہاں آکھیا جو اڄ دے ݙٰینھ ایں اجلاس نال خطاب ماݨ دی ڳالھ اے۔ کشمیری بھراواں نال آپݨی، حکومت پاکستان اتے پاکستانی عوام ولوں یکجہتی کرینداں، اڄ انہاں عظیم شہدا کوں سلام کریندے ہیں ڄئیں 7ڈھاکیاں توں اپݨی رت نال آزادی دیاں نا ٻھلݨ آلیآں داستاناں لکھین، نوجوان برہان وانی شہید توں ڳھن تے مرد آہن سید علی گیلانی تئیں کشمیری بہادر ٻالاں، ٻالڑیاں توں ڳھن تے آسیہ اندرابی، بہادر اتے بے خوف یٰسین ملک، میر واعظ عمر فاروق سودھا جدوجہد آزادی دے ہر قائد، کارکن، شہری، صحافی اتے ہر ٻال کوں سلام کریندے ہیں، ایں جدوجہد اچ تہاݙے نال ہیں، ڄے تئیں وادی اچ شہدا دے خون نال کشمیریاں کوں حق آزادی نئیں ملدا اتے او سرخرو نئین تھیندے، اساں نال کھڑی ہیں، کشمیریاں دی ولولہ انگیز جدوجہد بھارتی فوجیاں دا غرور ݙھوائے، ظلم و جبر دے باوجود اڄ وی غاصب بھارت دے فوجی جبر دے اڳو کشمیریاں دا آزادی دا عزم تکڑا کھڑے۔ انہاں آکھیا جو 5 فروری اے باور کریندے جو کہیں 5 اگست نال کشمیر بھارت دا حصہ نئیں ٻݨ سڳدا، ایکوں کشمیری منیندن، ڄڳ نا ہی اقوام متحدہ ڄھیں عالمی ادارے۔ انہاں آکھیا جو کشمیر پاکستان دی شہ رگ اے اتے پاکستان بابائے قائد دے فرمان دے مطابق ایں پالیسی تے ٹردا پئے جیندے اچ کوئی تبدیلی نئیں آسڳدی، تنازعہ جموں و کشمیر دا حل کشمیری عوام دی خواہشات اتے اقوام متحدہ دی سلامتی کونسل دی قرارداداں دے مطابق حق رائے دہی دے آزادانہ، منصفانہ و غیر جانبدارانہ استعمال نال ہی تھیسی، اے ہک ذݨین دے ٹوٹے دا نئیں ٻھل اے ایں وطن دے اصل مالک عوام دے جمہوری حق دا مسئلہ اے ڄیکؤں پورا ڄڳ منیندے، فلسطین اتے کشمیر دے عوام کوں انہان دی مرضی نال ڄیوݨ دا اے جمہوری حق ملݨ ڄڳ دی جمہوریت پسندی دا امتحان اے، کہیں ملک یا قوم کوں اے حق نئیں جو او فوجی قوت دی بنیاد تے کہیں ٻئے خطے اتے اتھو دے واسی لوکاں کوں غلام ٻݨا ڳھنے، فلسطین اتے کشمیر اچ جمہوریت دے اوہے اصول لاگو کرݨے ہوسن ڄیکوں پورا ڄق منیندے، ڄڳ اچ ݙو انڄھ انڄھ اصول، انصاف و جمہوریت دے اںجھ معیار اتے عالمی قانون دے نفاذ اچ وانڄھ قبول نئیں۔

انہاں آکھیا جو اساں کشمیریاں کیتے ڄڳ دے ہر فورم تے آواز چیندے رہسوں، ایہو میں اقوام متحدہ دی جنرل اسمبلی، او آئی سی سودھا ٻئے ہر فورمز دے اجلاساں اچ وی واضح کیتے، بھارت ایں ٻھل اچ نا رہوے جو او کالے، جابرانہ اتے فسطائی قوانین نال کشمیریاں توں انہاں دی سنڄاݨ کھس سڳدے، اساں چاھندے ہیں جو ڳالھ مہاڑ نال سفارتی و جمہوری اصولاں دے مطابق جموں و کشمیر سودھا سارے حل طلب مسلیاں کوں پرامن طریقے نال حل کیتا ونڄے جو رت وہاوݨ آلیاں کوں تاریخ اچ ہمیشہ ظالم اتے قاتل ڄاݨیا ویندے ڄݙاں جو انسانیت دے ݙکھ مکاوݨ آلے ہی تاریخ اچ عزت پیندن۔ انہاں آکھیا جو ڄݙاں وی لوڑھ پئی اساں اپݨے قومی مفادات کیتے اپݨی پوری قوت استعمال  کریسوں اتے اپݨی خود مختاری اتے دفاع تے کوئی سمجھوتہ نہ  کتیا ویسی۔ انہاں اکھیا جو کشمیری دے مسلے دا حل اعلان لاہور ہی اے جیڑھا اٹل بہاری واجپائی اتے سابق وزیر اعظم نوازشریف کیتا ہا جو اے مسلہ ڳالھ مہاڑ نال حل کیتا ویسی۔ انہاں یقین ݙیوایا جو پاکستان آزاد جموں و کشمیر دی ترقی و عوام دی بہتری کیتے پورا ہتھ ونݙیندا رہسی، جموں و کشمیر دی ترقی ضروری اے جو اے آزادی کشمیر دا بیس کیمپ اے۔ تقریب نال وزیراعظم آزاد کشمیر چوہدری انوار الحق وی خطاب کیتے۔