وفاقی وزیر تجارت جام کمال خان دی جنرل اتھارٹی آف فارن ٹریڈ دے ڈپٹی گورنر عبدال عزیز السکران نال ملاقات

اسلام آباد۔6فروری(اے پی پی) وفاقی وزیر تجارت جام کمال خان “میڈ اِن پاکستان” نمائش اتے بزنس فورم دے موقع تے اعلیٰ سعودی حکام نال خصوصی ملاقاتاں کیتن جنہاں اچ ݙوپاسے اقتصادی تعلقات کوں تکڑا کرݨ تے تجارت تے سرمایہ کاری دے موقع  ودھاوݨ تے ڳالھ مہاڑ کیتی ڳئی ۔ جاری اعلامیہ موجب ایں موقع تے جام کمال خان جنرل اتھارٹی آف فارن ٹریڈ دے ڈپٹی گورنر عبدال عزیز السکران نال ملاقات کیتی جیں اچ ݙوہیں رہنماواں پاکستان تے سعودی عرب وچال تجارتی و سرمایہ کاری تعاون مزید ودھاوݨ دا عزم کیتے ۔ عبدالعزیز السکران کامیاب تجارتی نمائش کراوݨ تے وفاقی وزیر تے حکومت پاکستان کوں مبارخ ݙتی ایں نمائش کوں ݙوہیں ملکاں وچال تجارتی تعلقات ودھاوݨ سانڳے اہم سنگ میل قرارݙتے ۔ وفاقی وزیر تجارت دی سعودی چیمبرز آف فیڈریشن دے چیئرمین، حسن مجیب الہویضی نال وی ملاقات تھئی جیں اچ ݙوہیں ملکاں وچال ادارہ جاتی شراکت داری اتے تجارتی تعلقات مزید مستحکم کرݨ تے ڳالھ مہاڑ کیتی ڳئی۔ ایں موقع تے جام کمال خان سعودی چیمبر دے کردار دی تعریف کریندے آکھیے ݙوپاسے تجارتی تعلقات ودھاوݨ سانڳے مزید کاروباری و تجارتی سرگرمیاں (بزنس ٹو بزنس) منظم کیتیاں ونڄݨیاں چاہیدن تاں جو نجی شعبے دے سٹیک ہولڈرز کوں ھک ݙوجھے دے نیڑے گھن آیا ونڄ سڳے تے تجارتی موقع کوں مزید وسعت ݙتی ونڄ سڳے ۔“میڈ اِن پاکستان” نمائش اتے بزنس فورم جیڑھا 5 توں 7 فروری 2025 تئیں جدہ انٹرنیشنل ایگزیبیشن اینڈ کنونشن سینٹر اچ جاری اے، پاکستانی صنعتکاراں اتے سعودی سرمایہ کاراں کوں ھک پلیٹ فارم ݙیندا پئے جتھاں او پاکستان دی صنعتی صلاحیتاں کوں اجاگر کرسڳدن تے مختلف شعبیں اچ ݙو پاسے تعاون دے نویں موقع ڳول سڳدن