پاکستان تے چین دا انسداد دہشت گردی، سی پیک دی ترقی اچ تعاون تکڑا کرݨ تے اتفاق، ݙو پاسے تعلقات خراب کرݨ دیاں کوششاں ناکام بݨاوݨ دا عزم ، صدر آصف علی زرداری دے دورے دے موقع تے مشترکہ اعلامیہ

بیجنگ/اسلام آباد۔6فروری(اے پی پی) پاکستان تے چین انسداد دہشت گردی، دفاع، زراعت، انفارمیشن ٹیکنالوجی سودھے ٻہوں سارے شعبیں اچ ݙوپاسے تعاون تکڑا کرݨ تے اتفاق کیتے تے ایں امر دا اعادہ کیتے جو ݙو پاسے تعلقات کوں مجروح کرݨ دیاں کوششاں ناکام تھیسن ۔ دفتر خارجہ  توں جاری مشترکہ اعلامیہ موجب عوامی جمہوریہ چین دے صدر شی جن پنگ دی دعوت تے صدر مملکت آصف علی زرداری 4 توں 8 فروری تئیں چین دا سرکاری دورہ کریندے پئن ۔ چین اچ آپݨے قیام دے دوران صدر مملکت نویں ایشیائی سرمائی کھیݙاں دی افتتاحی تقریب اچ وی شرکت کریسن ۔دورے دے دوران صدر شی جن پنگ صدر زرداری نال گرمجوشی اتے دوستانہ ماحول اچ ڳالھ مہاڑ کیتی انہاں نویں صورت حال اچ پاک چین تعلقات تے سانجھی دلچسپی دے بین الاقوامی اتے علاقائی امورتے تفصیلی ڳالھ مہاڑ کیتی ۔ صدر مملکت آصف علی زرداری نال عوامی جمہوریہ چین دے وزیراعظم لی کیانگ اتے نیشنل پیپلز کانگریس دی سٹینڈنگ کمیٹی دے چیئرمین ژائو لیجی وی ملاقات کیتی۔ بیان موجب فریقین ایں ڳالھ تے اتفاق کیتے جو چین پاکستان ہمہ موسمی سٹریٹجک کوآپریٹو پارٹنر شپ تاریخ اتے عوام دا انتخاب ہے اتے ایں کوں ݙوہیں ملکاں اچ زندگی دے سارے شعبیں دی طرفوں وسیع حمایت حاصل اے۔ بدلدے ہوئے بین الاقوامی حالات دا مقابلہ کرݨ دے بعد چین اتے پاکستان وچال پائیدار شراکت داری اتے پکی یاری جغرافیائی سیاسی مفادات توں بالاتر اے اتے علاقائی امن، استحکام اتے ترقی سانڳے ھک اہم مثبت عنصر اے۔ بیان موجب فریقین ہمیشہ ھک ݙوجھے کوں سمجھدے جو ھک ݙوجھے دی حمایت کیتی اے تے سٹریٹجک سانجھے اعتماد اتے عملی تعاون کوں گھاٹا کیتے ݙوہیں فریقاں آکھیے چین تے پاکستان دے تعلقات سٹریٹجک اہمیت رکھیندن ایں اچ خلل پاوݨ یا کمزور کرݨ دی کوئی وی کوشش ناکامی نال ݙوچار تھیسی۔ چین ایں ڳالھ دا اعادہ کیتے جو چین پاکستان تعلقات ایں دے خارجہ تعلقات اچ ھک ترجیح اتے چین دی خارجہ پالیسی اچ خصوصی اہمیت رکھیندن۔ پاکستان ایں ڳالھ تے زور ݙتے جو پاک چین تعلقات ایں دی خارجہ پالیسی دا سنگ بنیاد ہن ۔بیان اچ مزید آکھیا ڳئے جو ݙوہیں فریق اعلیٰ سطح دا سیاسی سانجھا اعتماد، اعلیٰ سطح دا عملی تعاون، اعلیٰ سطح دا  سکیورٹی تعاون اتے اعلیٰ سطح دی بین الاقوامی رابطہ کاری کوں مزید گھاٹا کریسوں ، نویں دور اچ مشترکہ مستقبل نال مزید نیڑے چین پاکستان کمیونٹی دی تعمیر سانڳے کوششاں تکھیاں کریسن تے ݙوہیں ملکاں دی سانجھی خوشحالی تے خطے دی ترقی سانڳے بھرپور کردار نبھیسن ۔ پاکستان صدر شی جن پنگ دی طرفوں پیش کیتے ڳئے گلوبل ڈویلپمنٹ انیشی ایٹو، گلوبل سکیورٹی انیشی ایٹو تے گلوبل سولائزیشن انیشی ایٹو دی تعریف اتے بھرپور حمایت دا اظہار کیتے۔ ݙوہیں فریقاں عالمی چیلنجز نال سانجھے طور تے نبݨݨ تے بنی نوع انسان سانڳے مشترکہ مستقبل نال ھک کمیونٹی  ودھاوݨ سانڳے بین الاقوامی تعاون ودھاوݨ تے اتفاق کیتے ۔ پاکستان کمیونسٹ پارٹی آف چائنا دی رہنمائی اچ چینی عوام دی طرفوں کیتی ڳئی عظیم ترقیاتی کامیابیاں دا ذکر کیتے تے ہر لحاظ نال ھک عظیم جدید سوشلسٹ ملک دی تعمیر دے عظیم مقصد کوں اڳوں ودھاوݨ تے چینی جدیدیت دے ذریعے چینی قوم دی بحالی کوں محسوس کرݨ اچ چین دی بھرپور حمایت دا اظہار کیتے۔ چین پاکستان دے قومی اقتصادی تبدیلی دے منصوبے (اڑان پاکستان) کوں نوٹ کریندے اقتصادی اصلاحات اتے قومی ترقی اچ پاکستان دی طرفوں ڳھدیاں ڳیاں کامیابیاں دی تعریف کیتی تے پاکستان دے استحکام، سلامتی، ترقی اتے خوشحالی دی خواہش دا اظہار کیتے۔ ݙوہیں فریقاں آپݨے بنیادی مفادات اتے اہم خدشات متعلق امورتے ک ݙوجھے کیتے آپݨی غیر متزلزل حمایت دا اعادہ کیتے ایں ڳالھ تے زور ݙتے اقوام متحدہ دی جنرل اسمبلی دی قرارداد 2758 دے اختیار اچ کوئی سوال یا چیلنج کائنی۔ پاکستان ون چائنا اصول تے آپݨے پختہ عزم کیتے جو اے تائیوان عوامی جمہوریہ چین دی سرزمین دا ھک ناقابل تنسیخ حصہ اے اتے تائیوان دا سوال چین دے بنیادی مفادات دا مرکز اے، پاکستان قومی اتحاد  گھنݨ سانڳے چین دی طرفوں ساریاں کوششاں دی تکڑے طریقے نال حمایت کریندے ”تائیوان دی آزادی“ دی ساری شکلاں دی سختی نال مخالفت کریندے ۔ بیان موجب پاکستان سنکیانگ، زیزانگ، ہانگ کانگ اتے بحیرہ جنوبی چین متعلق معاملات تے وی چین دی بھرپور حمایت کریسی ۔ چین اپݨی قومی خودمختاری، آزادی اتے علاقائی سالمیت دے دفاع اچ پاکستان دی تکڑی حمایت تے قومی سلامتی، استحکام، ترقی اتے خوشحالی دے تحفظ سانڳے پاکستان دی کوششاں دی حمایت دا اعادہ کیتے۔ فریقین مرکزی حکومتاں، مقامی حکام، قانون ساز اداریں تے سیاسی جماعتاں وچال اعلیٰ سطحی رابطے تکڑے بݨاوݨ ، مختلف محکمیں اچ مختلف سطح تے تبادلے تے تعاون ودھاوݨ تے حکمرانی دے تجربے نال تبادلہ کرݨ تے وی اتفاق کیتے۔ پاکستان نے پاکستان اچ چینی اہلکاراں تے تھیوݨ آلے دہشت گردانہ حملیں دی شدید مذمت کیتی تے ایں ڳالھ دی توثیق کیتی جو پاکستان اچ چینی اہلکاراں، منصوبیں تے اداریں دی حفاظت کوں یقینی بݨاوݨ چین دے ہمہ موسمی سٹریٹجک کوآپریٹو پارٹنر تے میزبان ملک دے طور تے پاکستانی حکومت دی اولین ذمہ داری اے۔ پاکستان چین دی قیادت تے عوام دا پاکستان دی پراݨی تے بھرپور حمایت تے دلوں شکریہ ادا کیتے ۔ݙوہیں فریقاں دہشت گردی دی ساری شکلاں دا مظاہر اچ زیرو ٹالرنس رویہ نال مقابلہ کرݨ دا عزم کیتے تے انسداد دہشت گردی تے ݙو پاسے تعاون مزید تکڑا کرݨ تے اتفاق کیتے ۔ پاکستان آکھیے او چینی اہلکاراں تے تھیوݨ آلے دہشت گرداںہ حملیں دی تحقیقات تے قصورواراں کوں  انصاف دی کچاری اچ گھن آوݨ دیاں کوششاں جاری رکھیسی اے جو سیکورٹی ان پٹ کوں مزید ودھیسی ۔  چین دہشت گردی دے خلاف جنگ اچ پاکستان دی لاتعداد کوششاں تے زبردست قربانیاں دی تعریف کیتی تے پاکستان دی انسداد دہشت گردی دی استعداد کاراچ ودھارے سانڳے ضروری تعاون ݙیوݨ تے آمادگی ظاہر کیتی۔ پاکستان صدر شی جن پنگ دے بیلٹ اینڈ روڈ انیشی ایٹو دی بھرپور تعریف کیتی۔ ݙوہیں فریقاں پاکستان اچ اعلیٰ معیار دے بیلٹ اینڈ روڈ تعاون دے اٹھ وݙے اقدامات تے عمل درآمد ودھاوݨ تے مشترکہ طور تے ترقی دی راہداری، معاش اچ ودھارا کرݨ آلی راہداری، ھک اختراعی راہداری، گرین کوریڈور اتے ھک کھلی راہداری بݨاوݨ تے اتفاق کیتے تاں جو پاکستان دے سی پیک دے پنج ایز دے فریم ورک نال مطابقت رکھݨ آلے اپ گریڈ شدہ ورژن بݨایا ونڄ سڳے۔بیان موجب 13 ویں سی پیک جوائنٹ کوآپریشن کمیٹی دا ذکر کریندے فریقین آکھیے او اعلیٰ معیار دی سی پیک دی ترقی سانڳے اقدامات کوں تکڑا بݨاوݨ سانڳے جے سی سی دے افعال کوں مزید فیدہ پڄاوݨ سانڳے پرعزم ہن۔ پاکستان سی پیک دے اپ گریڈ ورژن دی تشکیل تے سیمینار دے کامیاب انعقاد تے چین دی تعریف کیتی جیں توں پاکستانی حکام کوں چین دی ترقی دا پہلا تجربہ سکھݨ اچ مدد ملی تے اوں پاکستان کوں سکھݨ دا قیمتی موقع ݙتے۔ فریقین 14ویں جے سی سی اجلاس کوں وختی سانجھے طور تے طے شدہ تاریخ تے کرݨ تے اتفاق کیتے ۔ سانجھے بیان موجب ݙوہیں اعادہ کیتے جو ݙوہیں ملکاں دے رہنماواں وچال طے پاوݨ آلے اہم اتفاق رائے موجب مرحلہ وار اتے محفوظ طریقے نال ایم ایل ون دی اپ گریڈیشن اڳوں ودھاوݨ دی کوشش کیتی ویسی ۔ تے ایں ڳالھ دا وی اعادہ کیتے جو قراقرم ہائی وے (رائے کوٹ توں تھاکوٹ) دی بحالی دا منصوبہ چین تے پاکستان وچال زمینی رابطے سانڳے ٻہوں اہمیت رکھیندے تے ایں دے نفاذ تے فنانسنگ تے وختی اتفاق رائے تئیں پڄݨ تے اتفاق کیتے ۔ فریقاں گوادر دے نویں بین الاقوامی ہوائی اݙے دے باضابطہ افتتاح دا خیرمقدم کیتا، گوادر پورٹ دی جامع ترقی اتے آپریشن کو ودھارا ݙیوݨ دا عزم کیتے تاں جو صنعتی ترقی سانڳے مقامی اقتصادی ترقی کوں ودھاوݨ کیتے ماڈل لاجسٹک حب دے طور تے ایں کردار کوں مزید فیدہ پڄایا ونڄ سڳدے ۔ ݙوہیں پاسو گوادر پورٹ دی اہمیت منیندے رابطے تے تجارت دے اہم مرکز دے طور تے ایں دی صلاحیت کوں بہترین طریقے نال استعمال کرݨ تے اتفاق کیتے ۔انہاں عبوری افغان حکومت توں مطالبہ کیتے جو افغانستان اچ رہݨ آلے سارے دہشت گرد گروپاں کوں ختم کرݨ تے انہاں کوں مکاوݨ سانڳے واضھ تے قابل تصدیق اقدامات کرے جیڑھے علاقائی تے عالمی سلامتی سانڳے بدستور سنگین خطرہ بݨیا ہویا اے ۔ افغان انتظامیہ افغان سرزمین کوں ݙوجھے ملکاں دے خلاف استعمال کرݨ توں روکن۔ فریقین غزہ جنگ بندی دے معاہدے دا خیرمقدم کریندے امید ظاہر کیتی جو معاہدے تے موثر طریقے نال عمل تھیسی ۔ فریقین فلسطینی عوام دے حق خودارادیت سانڳے حمایت کیتی جیں اچ ھک آزاد ریاست فلسطین دے قیام دا حق وی شامل اے۔ سانجھے بیان موجب ݙوہیں فریق بین الاقوامی برادری نال رل تے مشرق وسطیٰ اچ امن اتے استحکام سانڳے مسلسل کوششاں کریسن ۔ صدر مملکت آصف علی زرداری دے دورے تے فریقین سی پیک، تجارت، سائنس اتے ٹیکنالوجی، لوکاں دے روزگار اتے میڈیا تعاون دا احاطہ کرݨ متعلق ھک درجن توں ودھ دستاویزات تے دستخط کیتن ۔ صدر مملکت آصف علی زرداری، صدر شی جن پنگ اتے چینی حکومت اتے عوام دی طرفوں آپݨی تے آپݨے وفد دی گرمجوشی نال مہمان نوازی سانڳے تعریف کیتی تے صدر شی جن پنگ کوں سانجھے طور تے مناسب ویلھے تے پاکستان دا دورہ کرݨ دی دعوت ݙتی ، فریقین ایں معاملے تے سفارتی ذرائع نال رابطہ برقرار رکھݨ تے اتفاق کیتے۔