این ڈی ایم اے دی جنگ زدہ فلسطین، لبنان اتے شام سانڳے 23ویں انسانی امدای کھیپ روانہ

اسلام آباد۔9فروری(اے پی پی) نیشنل ڈیزاسٹر مینجمنٹ اتھارٹی (این ڈی ایم اے) الخدمت فاؤنڈیشن نال رل تے فلسطین، لبنان تے شام اچ جنگ توں متاثرہ لوکاں دی مدد سانڳے 50 ٹن انسانی امداد دی 23 ویں امدادی کھیپ روانہ کیتی اے ۔ترجمان این ڈی ایم اے موجب وزیراعظم محمد شہباز شریف دی ہدایت دے تحت فلسطین (1,320 ٹن)، لبنان (372 ٹن) تے شام (111 ٹن) اچ متاثرہ کمیونٹیز دی مدد سانڳے ہݨ تئیں مجموعی طور تے 1,803 ٹن امدادی سامان پڄایا ڳئے ۔امدادی سامان پیک گوشت، پاؤڈر کھیر، حفظان صحت دی کٹس، کپڑے، کمبل، خیمے تے سلیپنگ بیگزشامل ہن ۔ اے امداد کراچی دے جناح انٹرنیشنل ایئرپورٹ توں چارٹرڈ فلائٹ دے ذریعے اردن بھیجی ڳئی۔کراچی دے جناح انٹرنیشنل ایئرپورٹ تے امدادی سامان دی روانگی دی تقریب اچ این ڈی ایم اے ، وزارت خارجہ اتے الخدمت فاؤنڈیشن دے سینئر حکام شرکت کیتی۔این ڈی ایم اے دے ترجمان آکھیے حکومت پاکستان لبنان، شام تے فلسطین اچ جنگ توں متاثرہ کمیونٹیز دی لوڑھ موجب امدادی سامان ݙیوݨ سانڳے پرعزم اے۔