ملک میکرو اقتصادی استحکام دے بعد شرح نمو اچ ودھارے دے رستے تے ٹردا پئے ، آئی ایم ایف دی منیجنگ ڈائریکٹر چنڳے انداز اچ معاملات اڳوں ودھواݨ تے پاکستان دی اقتصادی ٹیم دی تعریف کیتی اے ، وزیراعظم شہباز شریف دا وفاقی کابینہ اجلاس توں خطاب

اسلام آباد۔12فروری(اے پی پی) وزیراعظم محمد شہبازشریف آکھیے ملک میکرو اقتصادی استحکام دے بعد شرح نمو اچ ودھارے دے رستے تے ٹردا پئے ، آئی ایم ایف دی منیجنگ ڈائریکٹرچنڳے انداز اچ معاملات اڳوں ودھاوݨ تے پاکستان دی اقتصادی ٹیم دی ٻہوں تعریف کیتی اے ، ترسیلات زر اچ ریکارڈ ودھارا حکومت تے سمندر پار پاکستانیاں دے اعتماد کوں ظاہر کریندے ، انسانی سمگلنگ دے کالے دھندے دا ہمیشہ سانڳے خاتمہ کرݨا ہوسی ، سعودی عرب بہترین بھرا ملک تے بااعتماد دوست اے، پاکستان سعودی عرب دی خود مختاری اتے جغرافیائی سالمیت تے کݙاہیں آنچ نہ آوݨ ݙیسی ، غزہ اچ بدترین نسل کشی دی مثال تاریخ اچ نی ملدی ، ترکیہ دے صدر رجب طیب اردوان دے دورہ دے دوران ݙو پاسے تعلقات کوں تکڑا کرݨ تے تجارت دے ودھارے سانڳے مفاہمت دی مختلف یادداشتاں تے دستخط تھیسن۔اے ڳالھ انہاں وفاقی کابینہ دے اجلاس توں خطاب کریندے آکھی ۔ وزیراعظم آکھیے ابوظہبی اچ متحدہ عرب امارات دے صدر شیخ محمد بن زید النہیان نال ݙو پاسے تعلقات تے سرمایہ کاری سودھے مختلف امور تے تفصیلی ڳالھ مہاڑ تھئی ، آرمی چیف جنرل سید عاصم منیر وی ملاقات اچ موجود ہن، دبئی اچ ورلڈ گورنمنٹس سمٹ اچ پاکستان دی نمائندگی کیتی، ایں موقع تے دبئی دے فرمانروا، سری لنکا دے صدر، کویت دے وزیراعظم اتے بوسنیا دی چیئرپرسن صدارت نال وی ملاقاتاں تھئن، پاکستان تے سری لنکا دے تعلقات مثالی رہین ، ڈینگی دی وبا تے قابو پاوݨ تے علاج سانڳے سری لنکا دے ڈاکٹرز ساݙی بھرپور مدد کیتی ہئی ، سری لنکا دے صدر کوں پاکستان دورے دی دعوت وی ݙتی اے ۔ وزیراعظم ݙسائے جو دبئی اچ پاکستانی سرمایہ کاراں نال ملاقات اچ مثبت تجویزاں پیش کیتیاں ڳئن، انہاں کاروباراچ سوکھ پیدا کرݨ تے کاروباری و سرمایہ کاری ماحول بہتر بݨاوݨ دی لوڑھ تے زور ݙتے ، میں انہاں کوں ݙسائے جو پاکستان ݙینھ رات محنت پاروں میکرو اکنامک استحکام حاصل کر چکیے، ہݨ ساݙی توجہ شرح نمو اچ ودھارے تے مرکوز اے، سرمایہ کاراں کوں پاکستان آوݨ دی وی دعوت ݙتی اے ، انہاں دی تجویزاں تے عمل کرتے کاروبار اچ سوکھ ݙیوݨ سانڳے اقدامات کیتے ویسن ۔ وزیراعظم آکھیے ڈی پی ورلڈ دے چیف ایگزیکٹو افسر نال وی ملاقات تھئی اے تے او پاکستان اچ سرمایہ کاری ودھاوݨ چاہندن ، دبئی اچ ورلڈ گورنمنٹس سمٹ توں خطاب اچ ، میں غزہ تے فلسطین دے مسلماناں متعلق پاکستان دے مؤقف کوں بھرپور طریقے نال دنیا دے سامݨے پیش کیتے ، غزہ اچ 50 ہزار توں ودھ فلسطینی شہید تھی چکئن ، ایں توں وݙی بربریت اتے بدترین نسل کشی دی مثال تاریخ اچ نی ملدی ، ہݨ جنگ بندی دے بعد امید اے جو اتھاں امن قائم تھیسی تے فلسطینیاں دی بحالی سانڳے اقدامات کیتے ویسن۔ وزیراعظم آکھیے پاکستان سعودی عرب دی خود مختاری اتے جغرافیائی سالمیت سانڳے ہمیشہ آواز چاتی اے ، سعودی عرب پاکستان دا بہترین بھرا ملک تے بااعتماد دوست اے، پاکستان سعودی عرب دی خود مختاری اتے جغرافیائی سالمیت تے کݙاہیں آنچ نہ آوݨ ݙیسی ۔ وزیراعظم آکھیے آئی ایم ایف دی منیجنگ ڈائریکٹر نال وی دبئی اچ ملاقات تھئی، ایم ڈی آئی ایم ایف چنڳے انداز اچ معاملات اڳوں ودھاوݨ تے وزیر دفاع، وزیر بجلی، وزیر خزانہ تے انہاں دی ٹیم دی ٻہوں تعریف کیتی اے ۔عالمی مالیاتی ادارہ دی سربراہ دے تعریفی کلمات اساں کیتے حوصلہ افزا ہن۔جے اساں آپݨی معیشت کوں ترقی ݙیوݨی اے ، صنعتاں کوں ودھارا ݙیوݨا اے تاں ایں سانڳے اساکوں محنت کرݨی ہوسی ۔ وزیراعظم آکھیے آئی ایم ایف دی منیجنگ ڈائریکٹر کوں ݙسائے جو ترقی اوں ویلھے تھیسی جݙاں پیداواری لاگت اچ کمی آسی ، ڈیوٹیاں دا نظام بہتر تھیسی تے توانائی دی قیمت گھٹ تھیسی ایں توں ساݙی پیداوار ودھسی تے اساں دنیا دے ٻئے ملکاں دا مقابلہ کرسڳسوں جیں توں ایم ڈی آئی ایم ایف مثبت انداز اچ اتفاق کیتے تے آکھیے تساں اپݨا پلان گھن آؤ اساں ایں تے غور کریسوں جیں دے بعد صوبیں نال رل تے پلان دی تیاری تے کام شروع کرݨ دی ہدایت کرݙتی ڳئی اے ۔ وزیراعظم آکھیے سمندر پار پاکستانیاں کوں سہولتاݨ ݙیوݨ سانڳے پرعزم ہیسے ، سمندر پار پاکستانیاں دی طرفوں ترسیلات زر اچ ریکارڈ ودھارا تھئے تے جنوری اچ ترسیلات زر3 ارب ڈالر رہیاں ، ترسیلات زر اچ ودھارا سمندر پار پاکستانیاں دے حکومت تے اعتماد کوں ظاہر کریندے ۔ وزیراعظم آکھیے انہاں دے والد انہاں سانڳے ھک ادارے دی حیثیت رکھیندے ہن تے انہاں ہمیشہ محنت اتے لگن نال کم کرݨ تے عوام دی خدمت دی تلقین کیتی۔ انہاں آکھیے ساݙی محنت تے لگن نال پاکستان ھک عظیم ملک بݨسی تے آپݨے پیراں تے کھڑسی۔ وزیراعظم آکھیے ترکیہ دے صدر رجب طیب اردوان پاکستان دا ݙو ݙینھ دا دورہ کریندے پئن ، او اسلامی دنیا دے بہترین لیڈر ہن، انہاں ہمیشہ پاکستان دا ساتھ ݙتے ، ترکیہ دے صدر دا دورہ ٻہوں اہمیت رکھیندے ، انہاں دے دورے تے ݙو پاسے تعلقات اتے تجارت دے ودھارے متعلق مختلف مفاہمت دی یادداشتاں تے دستخط تھیسن ۔ وزیراعظم آکھیے لیبیا اچ حادثے تے پاکستانی وی جاں بحق تھئن، اساکوں ایں تے ٻہوں افسوس اے ، وزیر داخلہ اتے انٹیلی جنس ایجنسیاں انسانی سمگلنگ روکݨ سانڳے ھک ہن ، انسانی سمگلنگ دے کالے دھندے دا ہمیشہ خاتمہ کرݨا ہوسی۔