وفاقی وزیر تجارت جام کمال خان ،ترک وزیر تجارت پروفیسر ڈاکٹر عمر بولت دی ملاقات

اسلام آباد۔13فروری(اے پی پی) وفاقی وزیر تجارت جام کمال خان اتے ترک وزیر تجارت پروفیسر ڈاکٹر عمر بولت ھک اعلی سطحی ملاقات دے دوران تجارتی اتے سرمایہ کاری دے تعلقات کوں مستحکم کرݨ دا عزم کیتے ۔ وزارت تجارت توں جاری اعلامیہ موجب وفاقی وزیر تجارت جام کمال خان تے ترک وزیر تجارت پروفیسر ڈاکٹر عمر بولت ملاقات کیتی ۔ ایں موقع تے بھرپی تے سانجھے تعاون دے ودھارے دا عزم کیتے تے فریقین ٻہوں سارے شعبیں اچ ݙو پاسے اقتصادی تعاون ودھاوݨ دا عہد وی کیتے ۔  وفاقی وزیر تجارت جام کمال خان ترک وفد دا پرتپاک خیرمقدم کریندے ایں ڳالھ تے زور ݙتے جو پاکستان ترکی دا ’’ݙوجھا گھر‘‘ اے۔ انہاں نویں اقتصادی موقع ڳولݨ دی اہمیت تے زور ݙتا تے ایں دورے سانڳے ترکیہ دے وزیر تجارت نال اظہار تشکر کریندے ایں دورے کوں ݙوہیں ملکاں سانڳے ھک تاریخی لمحہ قرارݙتا ۔ترک وزیر تجارت پروفیسر ڈاکٹر عمر بولت پرتپاک استقبال تے اظہار تشکر کریندے اسلام آباد کوں ’’اسلام دا شہر‘‘ قرار ݙتا۔ انہاں مزید  آکھیے دورے دے دوران ، خدمات ، سیاحت ، تعلیم ، آئی ٹی ، دفاع اتے انفراسٹرکچر جیھے اہم شعبیں اچ معاہدیں تے دستخط کیتے ویسن ، جیں توں ترکی اتے پاکستان وچال نیڑے تے اسٹریٹجک شراکت داری دی نشاندہی تھیندی اے۔ ݙوہیں وزرا موجودہ چیلنجز نال نبݨݨ تے ݙوہیں ملکاں وچال مکمل تجارتی صلاحیت کوں کھولݨ سانڳے ترجیحی تجارتی معاہدے (پی ٹی اے) کوں بہتر بݨاوݨ دی لوڑھ تے ڳالھ مہاڑ کیتی۔ انہاں رکن ملکاں وچال تجارت ودھاوݨ سانڳے ڈی 8 ترجیحی تجارتی معاہدے کوں بحال کرݨ تے تکڑا کرݨ تے امکانات تے وی غور کیتا ۔ ترک وزیر تجارت پروفیسر ڈاکٹر عمر بولت  آکھیے ترک سرمایہ کار پاکستان اچ سرمایہ کاری ودھاوݨ چاہندن ۔وفاقی وزیر جام کمال خان غیر ملکی سرمایہ کاری کوں سوکھا بݨاوݨ سانڳے پاکستان دے عزم دا اعادہ کیتے ملک اچ  کاروباری سوکھ دے حوالے نال اقدامات کوں اجاگر کیتے۔ انہاں ترک کمپنیاں سانڳے سرمایہ کاری دے ہموار عمل کوں یقینی بݨاوݨ اچ خصوصی سرمایہ کاری دی سہولت کونسل (ایس آئی ایف سی) دے کردار تے زور ݙتے ۔ جام کمال  خان ترکیہ اچ “میڈ ان پاکستان”ھک ملکی نمائش کراوݨ دی تجویز پیش کیتی، جیں دا مقصد پاکستانی کمپنیاں کوں مختلف صنعتاں اچ اپݨی مصنوعات دی نمائش اے۔وفاقی وزیر تجارت جام کمال خان ترک وزیر تجارت کوں 17-19 اپریل تئیں پاکستان دی ہیلتھ کیئر اینڈ انڈسٹریل ایکسپو اچ شرکت دی دعوت ݙیندے ایں ڳالھ تے زور ݙتے جو میڈیکل ٹیکنالوجی تے ہسپتالاں دے بنیادی ڈھانچے اچ مشترکہ منصوبیں توں ݙوہیں ملکاں کوں چنڳاں فیدہ تھی سڳدے۔