پاکستان تے ترکیہ دا دفاع، معیشت، انفارمیشن ٹیکنالوجی، تعلیم، صحت سودھے مختلف شعبیں اچ ݙو پاسے تعاون ودھاوݨ تے اتفاق ،ݙو پاسے تجارتی حجم پنج ارب ڈالر تئیں ودھاوݨ دے عزم دا اعادہ

اسلام آباد۔13فروری(اے پی پی) پاکستان تے ترکیہ دفاع، معیشت، انفارمیشن ٹیکنالوجی، تعلیم، صحت سودھے مختلف شعبیں اچ ݙو پاسے تعاون ودھاو تے اتفاق کریندے ݙوپاسے تجارتی حجم پنج ارب ڈالر تئیں ودھاݨ دے عزم دا اعادہ کیتے ،وزیراعظم شہباز شریف آکھیے ترکیہ دے صدر نال مختلف شعبیں اچ رابطے ودھاݨ تے تفصیلی ڳالھ مہاڑ تھئی اے ، معاہدیں تے مفاہمت دی یادداشتاں تے عملدرآمد سانڳے ھک ٹیم دے طور تے کم کریسوں ، ݙوہیں ملکاں وچال پائیدار شراکت داری کوں ودھارا ملدا پئے ، بھرپی آلے تعلقات ویلھے دے نال مزید تکڑے تھیسن ، دہشت گردی پاکستان تے ترکیہ سانڳے سانجھا مسئلہ اے، اساں ایں لعنت کوں مکاوݨ سانڳے پرعزم ہیسے، توقع کریندوں جو افغانستان دہشت گردی کھںڈاوݨ دی بجائے دہشت گردی دے خلاف جنگ اچ تعاون کریسی جݙاں جو ترکیہ دے صدر رجب طیب اردوان آکھیے آپݨے سرمایہ کاراں کوں پاکستان اچ سرمایہ کاری دی ترغیب ݙیندے پیوں ، ترکیہ اقوام متحدہ دی قرارداداں تے کشمیری عوام دی خواہشات موجب مسئلہ کشمیر دے حل دی حمایت کریندا رہسی ، آزاد تے خود مختار فلسطینی ریاست دی حمایت کرینوں ۔ اے ڳالھ انہاں اتھاں پاکستان اتے ترکیہ وچال مختلف معاہدیں تے پروٹوکولز اتے مفاہمت دی یادداشتاں تے دستخط دے بعد مشترکہ پریس کانفرنس توں خطاب کریندے آکھی ۔ وزیراعظم شہباز شریف اتے ترکیہ دے صدر رجب طیب اردوان وچال ملاقات اتے اعلیٰ سطحی سٹرٹیجک تعاون کونسل دے اجلاس اچ تجارت، سرمایہ کاری، دفاع، زراعت، تعلیم، توانائی، سائنس و ٹیکنالوجی اتے بنیادی ڈھانچہ سودھے مختلف شعبیں اچ ݙو پاسے تعلقات اتے تعاون کوں ودھارا ݙیوݨ تے ڳالھ مہاڑ کیتی ڳئی۔ وزیراعظم آکھیے ترکیہ دے صدررجب  طیب اردوان کوں پاکستان  آوݨ تے خوش آمدید اکھینداں ،ݙوہیں ملکاں سانڳے آپ دا دورہ ٻہوں مفید ثابت تھیسی، آپ پنج سال بعد پاکستان دا دورہ کریندے پئن ، پاکستان دے عوام اڄ ٻہوں خوش ہن ،ترکیہ دے عوام نال پاکستان دے عوام دے گھاٹے تعلقات ہن تے اے صدیاں پراݨے ساݙے رابطے ویلھے دے نال تکڑے تھیندے پئن ، ݙوہیں ملکاں وچال بھرپی دے تعلقات ودھدے پئن ۔  ترکیہ اچ آزادی دی تحریک دے دوران برصغیر دے عوام  انہاں دی بھرپور حمایت کیتی ۔ انہاں آکھیے ترکیہ زلزلہ ، چھل سودھے ہر اوکھے ویلھے پاکستان دا ساتھ ݙتا ،  2010 اچ جݙاں پنجاب اچ وݙے پیمانے تے چھل آئی تاں ترکیہ دی حکومت آپ دی قیادت اچ پاکستان دے عوام دی بھرپور مدد کیتی،ایں توں ساݙے بھرپی دے تعلقات ظاہر تھیندن ، ترکیہ دی خاتون اول اتے آپ چھل توں متاثرہ  علاقیں دا دورہ کیتا ،سکول، ہسپتال اتےگھر بݨوائے، وݙا دل کرتے امداد نال پاکستانی عوام دے دل جت ڳھدے ، مولانا جلال الدین رومی دے کلمات اساکوں یاد ہن جنہاں آکھیا ہئی ہمدردی تے فضل ،سورج جݙاں جو سخاوت اتے ݙوجھیں دی امداد کرݨ دریا دی مثل اے۔  انہاں آکھیے ݙوہیں ملکاں دے بھرپی دے تعلقات ویلھے نال مزید تکڑے تھیسن، آپ دے دورے توں ساݙے برادرانہ تعلقات کوں نویں جہت ملی اے۔ وزیراعظم آکھیے صدر رجب طیب اردوان اسلامی دنیا دے ٻہوں قابل احترام رہنما ہن، اپݨے وژن اتے قائدانہ صلاحیتاں پاروں نہ صرف ترکیہ کوں بدل تے رکھ ݙتے بلکہ ترکیہ دا شمار ہݨ دنیا دے اہم ملکاں اچ تھیندے ۔ ترکیہ غزہ، فلسطین اتے کشمیر دے مظلوم عوام سانڳے بھرپور اتے واضح موقف اختیار کیتے جیں کوں بُھلایا نی ونڄ سڳداوزیراعظم آکھیے پاکستان تے ترکیہ وچال پائیدار شراکت داری ودھدی پئی اے ، ترکیہ ہمیشہ بھارت دے غیر قانونی زیر تسلط جموں و  کشمیر دے عوام سانڳے واضح موقف اختیار کیتے، ایویں پاکستان شمالی قبرص دے معاملے تے ترکیہ دے موقف دی مکمل حمایت کریندے ۔ وزیراعظم آکھیے دہشت گردی مکاوݨ سانڳے پاکستان دے عوام اتے پاکستان دی سکیورٹی فورسز دی قربانیاں کوں جیویں آپ ݙٹھے ایں تے تساڈے شکرگزار ہیسے ،دہشت گردی پاکستان تے ترکیہ سانڳے سانجھا مسئلہ اے اساں اے لعنت مکاوݨ سانڳے پرعزم ہیسے۔ افغانستان ساݙا ہمسایہ ملک اے ،اساں توقع کریندوں افغانستان دہشت گردی کھنڈاوݨ دی بجائے دہشت گردی دے خلاف جنگ اچ تعاون کریسی ۔  وزیراعظم آکھیے ترکیہ دے صدر نال اساں تجارت، سرمایہ کاری، سٹرٹیجک تعاون، دفاعی تعاون سودھے مختلف شعبیں اچ رابطے ودھاوݨ تے ڳالھ مہاڑ کیتی ، ݙوہیں ملکاں وچال معاہدیں تے مفاہمت دی یادداشتاں تے دستخط وی کیتے ڳئن جنہاں اچ خصوصی اقتصادی زونز دا قیام وی شامل اے جیڑھا جو ترکیہ دی کمپنیاں بݨیسن ، اساں انہاں دی معاہدیں تے مفاہمت دی یادداشتاں تے عملدرآمد سانڳے ھک ٹیم دے طور تے کم کریسوں ۔  ترکیہ دے صدر رجب طیب اردوان آکھیے پاکستان کوں اساں آپݨا ݙوجھا گھر سمجھدوں تے ساݙے درمیان دوستی دا تکڑا رشتہ اے ،آزادی دی جنگ دے دوران برصغیر دے عوام ساݙی بھرپور حمایت کیتی، قائداعظم محمد علی جناح اتے علامہ محمد اقبال ساݙے وی ہیرو ہن ،پاکستان آتے دلوں خوشی تھئی اے ۔ ݙوہیں ملکاں وچال اعلیٰ سطحی سٹریٹجک کونسل 2009 اچ بݨائی ڳئی ہئی ،اے ݙوہیں ملکاں وچال دوستی کوں مزید تکڑا بݨاوݨ دا ھک اہم فورم اے ،کونسل دے ستویں اجلاس اچ اساں ݙو پاسے تعلقات کوں مزید تکڑا بݨاوݨ تے اتفاق کیتے ،تجارت ،آبی وسائل ، دفاع ،تعلیم ،توانائی ،ثقافت اتے ٻئے شعبیں اچ تعاون ودھاوݨ سانڳے 24 معاہدیں تے مفاہمت دی یادداشتاں تے دستخط  کیتے ڳئن ۔ اساں نہ صرف ݙو پاسے بلکہ علاقائی اتے عالمی امور تے وی تفصیلی ڳالھ مہاڑ کیتی اے ، صدر آصف علی زرداری نال ملاقات اچ وی  ݙوپاسے تعلقات ودھاوݨ متعلق امور تے ڳالھ مہاڑ تھئی ۔انہاں آکھیے ݙوہیں ملکاں وچال بزنس فورم وی تھیندا پئے جیں اچ کاروباری شخصیات شامل ہوسن ،اساں آپݨے سرمایہ کاراں کوں پاکستان اچ سرمایہ کاری دی ترغیب ݙیندے پیوں ، پاکستان تے ترکیہ وچال ݙو پاسے تجارت دا حجم پنج ارب ڈالر تئیں ودھاوݨ سانڳے ڳالھ مہاڑ کیتی اے، ایں توں انڄ ملٹری ڈائیلاگ اتے دفاعی صنعت دے شعبے اچ تعاون  ودھیسوں ۔ ݙوہیں ملکاں وچال تکڑے تعلقات دی عکاسی ایں ڳالھ توں وی تھیندی اے جو ݙوہیں ملکاں ہر اوکھے ویلھے ھک ݙوجھے دا ساتھ ݙتا ۔ پاکستان دے عوام دی طرفوں ترکیہ دے عوام نال یکجہتی کوں بُھل نی سڳدے اساں دہشت گردی تے علاقائی خطرے نال نبݨݨ سانڳے پاکستان دی قربانیاں کوں سرہیندوں تے ہر قسم دی دہشت گردی دے خلاف جنگ اچ پاکستان دی غیر مشروط حمایت کریندوں ، دہشت گردی دے واقعات اچ شہید تھیوݨ آلے بہادر سکیورٹی فورسز دے اہلکاراں اتے پاکستانی عوام نال دلی تعزیت کریندوں تے زخمیاں دی وختی صحت یابی اتے شہداء دے اُچے درجات سانڳے دعا کریندوں ، پاکستان دی طرفوں ترکیہ اچ دہشت گردی اتے دہشت گرد تنظیماں دے خلاف جنگ اچ حمایت دی تعریف کریندوں ۔فتح تنظیم کوں دہشت گرد قرارݙیوݨ تے ایں دے سکولاں کوں ترک معارف فاؤنڈیشن دے حوالے کرݨ دہشت گردی دے خلاف جنگ اچ ساݙے مشترکہ عزم دا عکاس اے،ترکیہ دی معارف فائونڈیشن دے سکولاں دا پاکستان دے تعلیمی شعبہ اچ اہم کردار ہوسی اساں سکالرشپ دے پروگراماں دے ذریعے آوݨ آلیاں نسلاں سانڳے وی  دوستی دے رشتے کوں تکڑا بݨیندے رہسوں ۔ترک صدر آکھیے ترک ریاست تے قوم ماضی وانڳوں کشمیری بھراویں نال اظہار یکجہتی کریندی اے ،ترکیہ اقوام متحدہ دی قرارداداں اتے کشمیری عوام دی خواہشات موجب مسئلہ کشمیر دے حل دی حمایت کریندا ہریسی ، پاکستان دی طرفوں قبرص دے معاملے تے حمایت اساں کیتے ٻہوں اہمیت رکھیندی اے ۔ مسئلہ فلسطین تے پاکستان دا غیر متزلزل موقف ٻہوں اہم اے اساں پاکستان نال رل تے اقوام متحدہ ،او آئی سی اتے ٻئے بین الاقوامی پلیٹ فارمز تے فلسطینیاں دے جائز حق سانڳے آواز چیندے رہسوں ،ایجھے ویلھے اچ جݙاں غزہ دے بھیݨ بھراویں متعلق نویں منصوبے پیش کیتے ویندے پئن ،  سانجھے تعاون کوں تکڑا بݨاوݨ ضروری اے، اساں ھک آزاد تے خود مختار فلسطینی ریاست دی حمایت کریندوں جیں دا دارالحکومت القدس شریف ہووے تے اے1967ء توں پہلے دی سرحداں دی بنیاد تے بݨے ۔انہاں آکھیے وزیراعظم شہباز شریف ،صدر آصف علی زرداری اتے پاکستانی  حکام اتے پاکستان دے بھرا عوام دی طرفوں میزبانی تے انہاں دا شکریہ ادا کریندوں ،امید اے ݙوہیں وچال تھیوݨ آلے معاہدے اتے مفاہمت دی یادداشتاں ݙوہیں ملکاں تے علقے سانڳے فیدہ مند ثابت تھیسن ۔ انہاں آکھیے ترکیہ اچ تیار کیتی ونڄݨ آلی الیکٹرک کار او وختی بھرا شہباز شریف کوں پیش کریسوں ۔ اے پاکستان تے ترکیہ وچال تکڑی دوستی دی علامت ثابت تھیسی تے اے الیکٹرک کار صدر آصف علی زرداری سانڳے مفید ثابت تھیسی۔