صدر مملکت آصف علی زرداری اتے ترک صدر رجب طیب اردوان دی ملاقات

اسلام آباد۔13 فروری(اے پی پی) پاکستان اتے ترکیہ ݙوطرفہ اقتصادی و تجارتی تعلقات ودھاوݨ، باہمی تجارت دا حجم 5 ارب ڈالر تئیں ودھاوݨ سانڳے کٹھیاں کوششاں کرݨ تے اتفاق کیتے۔ اے اتفاق صدر مملکت آصف علی زرداری اتے ترک صدر رجب طیب اردوان ایوان صدر اسلام آباد اچ ملݨ ویلھے کیتے۔ ایں توں پہلے ایوان صدر پڄݨ تے صدر مملکت آصف علی زرداری ترک صدر ، خاتون اول اتے انہاں دے وفد دا خیر مقدم کیتے۔

ݙوہیں رہنماواں ملاقات اچ باہمی دلچسپی دے امور، تجارت و سرمایہ کاری ودھاوݨ،اقتصادی تعلقات تکڑے رکݨ، معیشت دی بہتری، عاقائی و عالمی امن سانڳے کٹھیاں کوششاں کرݨ دے مواقع تے الایا۔صدر مملکت آصف علی زرداری ترکیہ نال ݙوطرفہ تجارت ودھاوݨ،بینکنگ دے شعبے اچ تعاون،فضائی روابط تکڑے کرݨ تے زور ݙیندے آکھیے جو ترکیہ نال اپݨی تاریخی سنڳت کوں ٻیا ودھاوݨ چاہندے ہیں، علاقائی و عالمی مسلیاں تے ݙوہاں ملکاں دا ہکو موقف اے،ایں سانڳے آپسی ڳانݙھا ودھایا ویسی۔ انہاں مسلہ کشمیر ، فلسطین اتے شام دی اڄوکی صورتحال تے الیندے انہاں تنازعات دے فوری حل تے زور ݙتے۔انہاں ترک کمپنیاں کوں پاکستان اچ سرمایہ کاری دے مواقع توں فیدہ چاوݨ دی دعوت ݙتی۔

صدر طیب اردوان بہترین مہانداری تے پاکستان دی حکومت اتے عوام دا شکریہ ادا کریندے آکھے جو ایں تعلق کوں آندی نسلاں تئیں منتقل کرݨ چاہندے ہیں، خواہش اے جو پاکستان نال ݙوطرفہ تجارت 5 ارب ڈالر تئیں ودھائی ونڄے تاں جو خطے اچ امن و سلامتی اتے معاشی استحکام دی راہ نکلے۔  ایں موقع تے صدر مملکت آصف علی زرداری ترک صدر ، خاتون اول اتے انہاں دے وفدکوں عشائیہ وی ݙتے۔