خطے اچ معاشی تبدیلیاں اچ سعودی عرب داکردار اہمیت رکھیندے، سعودی وژن پاکستان کیتے ہک بیش قیمت ماڈل اے، وزیرخزانہ محمداورنگزیب داعرب نیوز کوں انٹرویو

اسلام آباد۔17فروری  (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو خطے اچ معاشی تبدیلیاں اچ سعودی عرب داکردار اہمیت رکھیندے، سعودی وژن پاکستان کیتے ہک بیش قیمت ماڈل اے۔ اے ڳالھ انہاں سعودی عرب اچ ابھردی ہوئی معیشتاں بارے العلاء کانفرنس دے موقع تے سعودی عرب دے اخبارعرب نیوز کوں انٹرویو ݙیندیں ہوئیں آکھی۔ وزیرخزانہ آکھیا جو پاکستان اتے سعودی عرب وچال تاریخی اتے مضبوط سانجھی داری اے۔ وزیرخزانہ آکھیا جو سعودی عرب معاشی اصلاحات دے شعبہ اچ آپݨے اہداف توں ودھ ڳئے اتے پاکستان آپݨی اڄوکی معاشی استحکام دی بنیاد تے سعودی وژن 2030 توں ٻہوں کڄھ سکھ سڳدے۔ سعودی عرب جئیں رفتار نال ترقی کیتی اے او پاکستان کیتے متاثر کن اے۔ وزیرخزانہ آکھیا جو پاکستان اچ سعودی عرب دی خصوصی طور کاروباری شعبے اچ سرمایہ کاری ودھدی پئی اے۔  انہاں سعودی آرامکو دی پاکستان اچ ڈائون سٹریم پٹرولیم انڈسٹری اچ سرمایہ کاری اتے حکومتی سطح تے جاری مذاکرات کوں اہم پیش رفت قرار ݙتا۔  وزیر خزانہ آکھیا جو سعودی عرب اچ پاکستانی برآمدات خصوصی طور ہنرمند ورکراں دی برآمدا اچ ودھارے دے ٻہوں موقع موجود ہن۔ وزیر خزانہ آکھیا جو العلاء کانفرنس ابھردی ہوئی معیشتاں کیتے معاشی استحکام اتے تعاون تے ڳالھ مہاڑ کرݨ دا ہک اہم پلیٹ فارم اے۔