قرضیاں دی بجائے سرمایہ کاری اتے سانجھے داری ترجیح اے، ادارہ جاتی تے معاشی اصلاحات دا پروگرام تیزی نال جاری اے، وزیراعظم شہباز شریف دی عالمی بینک دے ایگزیکٹیو ڈائریکٹرز دے وفد نال ڳالھ مہاڑ

اسلام آباد۔17فروری  (اے پی پی) وزیراعظم محمد شہباز شریف آکھیا جو قرضیاں دی بجائے سرمایہ کاری اتے سانجھے داری ترجیح اے، ادارہ جاتی تے معاشی اصلاحات دا پروگرام تیزی نال جاری اے۔ معیشت سدھے پاسے ویندی پئی اے۔ کرپشن کوں کنٹرول کرݨ کیتے نظام شفاف کریندے پئیوں، عالمی بینک دے کنٹری پارٹنرشپ فریم ورک دے تحت پاکستان اچ 40 ارب ڈالر دی سرمایہ کاری تھیسی۔ وزیراعظم آفس دے میڈیا ونگ توں جاری بیان موجب اے ڳالھیں انہاں عالمی بینک دے ایگزیکٹیو ڈائریکٹرز دے وفد نال ڳالھ مہاڑ کریندیں ہوئیں آکھی جنہاں سنوار کوں وزیراعظم نال ملاقات کیتی۔ وزیراعظم آکھیا جو عالمی بینک اتے پاکستان دی سانجھی داری گزریل ست ݙھاکیاں توں اے، عالمی بینک دے تعاون نال پاکستان اچ ملکی تعمیر تے ترقی بارے کئی وݙے منصوبے تعمیر تھین جنہاں پاکستان دی ترقی اچ اہم کردار ادا کیتے۔ وزیراعظم آکھیا جو پاکستان عالمی بینک نال سانجھی داری دا فیدہ چاتے۔ عالمی بینک 2022 اچ چھل اچ پاکستان اچ متاثرہ لوکاں دی مدد کیتی۔ عالمی بینک دے اڄوکے کنٹری پارٹنرشپ فریم ورک دے تحت پاکستان اچ 40 ارب ڈالر دی سرمایہ کاری تھیسی جو چنڳی ڳالھ اے۔ 20 ارب ڈالر نال پاکستان اچ صحت، تعلیم، ترقیِ نوجوانان اتے ٻئے سماجی شعبیاں اچ مختلف منصوبیاں اچ ترقی تھیسی۔ وزیراعظم آکھیا جو ایف بی آر دی اصلاحات اچ ڈیجیٹائزیشن  تے کم جاری اے۔ بجلی دے شعبے اچ اصلاحات نال بلاتعطل فراہمی اتے خسارے اچ ڳھٹکی کریندے پئیوں۔ ایس آئی ایف سی پاروں ملک اچ سرمایہ کاری کیتے پرکشش ماحول ݙتا ویسی۔ وزیراعظم آکھیا جو قرضیاں دی بجائے سرمایہ کاری اتے سانجھے داری ترجیح اے۔  وفد حکومت دے توانائی، صنعت تے برآمدات، نجکاری، محصولات تے ٻئے شعبیاں اچ اصلاحاتی اقدامات دی تعریف کیتی۔ ورلڈ بینک دے 9  ایگزیکٹیو ڈائریکٹرز پاکستان دے دورے تے ہن اتے او ورلڈ بینک اچ دنیا دے مختلف ملکاں دے پورٹ فوپلیو دے نگران ہن۔ وفد پاکستان اچ معاشی ترقی دے منصوبیاں اتے سرمایہ کاری بارے ڳالھ مہاڑ کریسی۔ ملاقات اچ وفاقی وزرا احسن اقبال، احد خان چیمہ، سردار اویس خان لغاری، ڈاکٹر مصدق ملک، وزرا مملکت علی پرویز ملک، شزہ فاطمہ خواجہ، وزیراعظم دی کوآرڈینیٹر رومینہ خورشید عالم، سینیٹر شیری رحمن، رکن قومی اسمبلی نفیسہ شاہ، وزیرِ اعظم دی نمائندہ برائے پولیو پروگرام عائشہ رضا فاروق اتے متعلقہ اعلیٰ حکام  وی موجود ہن۔