نیویارک۔18فروری (اے پی پی) نائب وزیراعظم تے وزیرخارجہ سینیٹر محمد اسحاق ڈار آکھیا جو فعال سفارتکاری نال پاکستان دا سفارتی کلھیپا مُک ڳئے، حکومتی کارکردگی پاروں قومی معیشت ترقی کریندی پئی اے،وزیراعظم محمد شہبازشریف دی قیادت اچ حکومت دی کارکردگی اچ قومی معیشت ترقی کریندی پئی اے۔ اے ڳالھیں انہاں آپݨے امریکا دے دورے اچ گزریل رات پاکستانی کمیونٹی توں خطاب کریندیں ہوئیں آکھی۔ انہاں نیو یارک اچ پاکستان قونصلیٹ اچ پاکستانی کمیونٹی نال ݙو گھنٹے ملاقات کیتی۔ ایں موقع تے انہاں آکھیا جو اساں سفارتی طور کلھے کائنی، بین الاقوامی برادری اچ پاکستان دے ٻہوں دوست ہن اتے پاکستان اڄوکے ݙو وݙے بین الاقوامی ایونٹس کرائن۔ ایس سی او کانفرنس اتے مسلم معاشرے اچ چھوہریں دی تعلیم بارے عالمی کانفرنس اچ کئی ملکاں دے سربراہ مملکت پاکستان دا دورہ کیتے جڈانجو ترکیہ دے صدر رجب طیب اردوان وی پاکستان نال یکجہتی کیتی اے۔ ایں موقع تے سینیٹر محمد اسحاق ڈار اقوام متحدہ دی سلامتی کونسل اچ 2 سال دی مدت کیتے پاکستان دے 182ووٹاں دی بھاری اکثریت نال انتخاب کوں اجاگر کیتا۔ پاکستانی کمیونٹٰی نال ملاقات دے موقع تے اقوام متحدہ اچ پاکستان دے مستقل مندوب منیر اکرم، امریکااچ پاکستان دے سفیر رضوان سعید شیخ ، اقوام متحدہ اچ متبادل مستقل مندوب عاصم افتخار احمد اتے نیویارک اچ پاکستان دے قونصل جنرل عامر عطازئی وی موجود ہن۔ سینیٹر محمد اسحاق ڈار تقریب دے شرکا دے سوالاں دے جواب ݙتے اتے آکھیا جو ٻاہرلے ملک پاکستانیاں دے مسئلیاں دے خاتمے کوں یقینی ٻݨایا ویسی۔
