نیویارک۔20 فروری(اے پی پی)نائب وزیراعظم و وزیر خارجہ سینیٹر محمد اسحاق ڈار آکھیے جو او آئی سی ممالک دے وزرائے خارجہ دی کونسل دا غیر معمولی اجلاس 7 مارچ کوں جدہ اچ تھیسی۔ نائب وزیر اعظم نیویارک اچ پریس کانفرنس کریندے ذرائع ابلاغ کوں غزہ دے لوکاں کوں مصر یا اردن منتقل کرݨ اتے بعد اچ اسرائیل ولوں سعودی عرب اچ فلسطینی ریاست دے قیام دی تجاویز دے بعد ایران، مصر، ملائیشیا، متحدہ عرب امارات، سعودی عرب اتے ترکیہ دے ہم منصباں نال ٹیلی فونک ڳآلھ دا ݙسایا جو وزرائے خارجہ مارچ دے شروع اچ او آئی سی دی وزرائے خارجہ کونسل دا فوری غیر معمولی اجلاس سݙݨ دا مطالبہ کیتے۔ انہاں آکھیا جو عرب رہنما 27 فروری اتے خلیجی رہنماواں دی ملاقات 5 مارچ کوں تھیسی جیندے بعد 7 مارچ کوں جدہ اچ او آئی سی ممالک دے وزرائے خارجہ دی کونسل دا غیر معمولی اجلاس تھیسی جیندے اچ او پاکستان دی نمائندگی کریسن۔ نائب وزیراعظم فسایا جو مشاورت توں پہلے پاکستان وی نقل مکانی دی تجاویز تے سخت بیان ݙتے جو فلسطینی عوام کوں اپݨی سرزمین تے سارے حقوق ہین ایں سانڳے حکومت دا موقف بالکل واضح اے ڄئیں 50 ہزار فلسطینیاں دے قتل اتے انفراسٹرکچر دی تباہی دا ذمہ دار اسرائیل کوں قرار ݙتے۔ انہاں آکھیا جو محدود وسائل دے باوجود پاکستان امدادی سامان غزہ، لبنان اتے شام بھیجیے، 200 فلسطینی میڈیکل طلباء دی میزبانی کیتی اے جو او پاکستانی میڈیکل کالجز اچ اپݨی طبی تعلیم مکمل کرسڳن۔ ایں سانڳے اقوام متحدہ دے سیکرٹری جنرل انتونیو گوتریس، سعودی عرب اتے ہنگری دے ہم منصباں نال وی الائے۔ نائب وزیراعظم پاکستانی تارکین وطن نال وی ڳالھ مہاڑ کیتی۔ انہاں آکھیا جو پاکستان کئی واری افغان عبوری حکومت کوں آکھیے جو او ٹی ٹی پی دے خلاف کارروائی کرے جیندیاں افغانستان اچ پناہ گاہیں ہین، کراچی اتے بشام اچ چینی شہریاں تے حملیاں دی تحقیقات اچ وی سامݨے آئے جو انہاں دی منصوبہ بندی اتے مالی معاونت افغانستان توں کیتی گئی ہئی۔
