لکھنو۔23فروری (اے پی پی) بھارت اچ جاری” ریپڈ ریل” اتے ”میٹرو کوریڈور” منصوبیاں دی آڑ اچ گزریل رات میرٹھ اچ 168سال پراݨی مسیت ݙہا ݙتی ڳئی۔ کشمیر میڈیا سروس موجب مسیت منصوبے دے تعمیراتی راہ اچ ہئی جئیں کوں نیشنل کیپیٹل ریجن ٹرانسپورٹ کارپوریشن ٻݨیندی پئی ہئی۔ انہدام پولیس اتے حکام دی نگرانی اچ تھیا۔ ابتدائی طور خمیس کوں کڄھ لوکاں ہتھوڑیاں نال مسیت دے کڄھ حصیاں کوں ٻھنݨ شروع کیتا۔ بعد اچ خمیس دی رات 1:30 وڄے مسماری کوں مکمل کرݨ کیتے بلڈوزرز دا استعمال کیتا ڳئیا۔ حکام 20فروری کوں مسیت دی بجلی کٹ ݙتی ہئی۔ مسیت انتظامیہ دی نمائندگی کریندیں ہوئیں حاجی سوالہیں ݙسیا جو انہاں کنے 1857 دے قانونی دستاویزات موجود ہن جو مسیت دی موجودگی کوں ثابت کریندن۔ انہاں آکھیا جو انہدام دے ݙینھ مسیت اچ جمعے دی نماز کائنا تھئی ہئی۔
