باکو۔24فروری (اے پی پی)پاکستان اتے آذربائیجان معیشت ، سرمایہ کاری ، دفاع ، توانائی سودھے مختلف شعبیاں اچ تعلقات ودھاوݨ دا عزم کریندیں ہوئیں آکھیا جو ݙوہیں ملکاں وچال اقتصادی رابطے نال ترقی تے خوشحالی امسی۔ وزیراعظم محمد شہباز شریف آکھیا جو ݙوہیں ملکاں وچال تھیوݨ آلے معاہدیاں کوں ہک مہینے اچ چھیکڑی شکل ݙیوݨ تے اتفاق تھیے۔ ݙو ارب ڈالر دی سرمایہ کاری معاہدیاں تے اپریل اچ دستخط تھیسن۔ کاراباخ دےمسئلے تے آذربائیجان دی حمایت کریندے رہسوں، مسئلہ کشمیر تے آذربائیجان دے اصولی موقف دی تعریف کریندوں۔ مشرق وسطیٰ اچ پائیدار امن کیتے ݙوریاستی حل ضروری اے۔ چاہندوں جو غزہ اچ جنگ بندی پائیدار اتے دیرپا ہووے۔ آذربائیجان دے صدرالہام علیوف آکھیا جو پاکستان نال ٻہوں نیڑے دے تعلقات کوں ودھاوݨ دا عزم کریندوں، ݙوپاسہ تجارت ودھاوݨ دی لوڑھ اے۔ مفاہمت دی یادداشتاں اتےمعاہدیاں نال ݙوہیں ملکاں دے تعلقات مضبوط ٻݨاوݨ اچ مدد ملسی۔ سنوار کوں باکو اچ پاکستان اتے آذربائیجان وچال مختلف شعبیاں اچ معاہدیاں اتے مفاہمت دی یادداشتاں تے دستخطاں دے بعد سانجھی پریس کانفرنس توں خطاب کریندیں ہوئیں وزیراعظم محمد شہباز شریف آکھیا جو آذربائیجان دے دورے دی دعوت اتے بھرپور میزبانی تے صدر الہام علیوف دا شکریہ ادا کریندوں، باکو اچ آپݨے فطری حسن اتے قدرتی مناظر پاروں ٻہوں سوھݨا شہر اے۔ اساں وی اسلام آباد کوں باکو وانڳوں سوھݨا شہر ٻݨاوݨ اچ مصروف ہیسے۔ وزیراعظم آکھیا جو آذربائیجان دے صدر نال ملاقات تعمیری اتے مفید رہی اے۔ انہاں آکھیاجو آذربائیجان دے صدر دے دورہ پاکستان نال ݙوہیں ملکاں دے تعلقات ودھین۔ انہاں پاکستان اچ ݙوارب ڈالر دی سرمایہ کاری دا اعلان کیتا ہئی جو ݙوہیں ملکاں کیتے فیدہ مند ثابت تھیسی۔ اپریل اچ اسلام آباد اچ آذربائیجان دے صدردے دورے اچ انہاں معاہدیاں تے دستخط تھیسن۔ ݙوہیں ملکاں وچال مختلف سطح تے تعلقات ودھدے پئن۔ آذربائیجان دے صدر دے خلوص ، قیادت ،بصیرت اتے وژن نال ٻہوں متاثر تھیاں۔ وزیراعظم آکھیا جو کاراباخ دے مسئلے تے آذربائیجان دے موقف دی ہمیشہ حمایت کیتی اے،آذربائیجان دے صدر دے وژن ،جرأت اتے فیصلہ سازی دی صلاحیت نال خطے اچ امن تھیے۔ وزیراعظم آکھیا جو کشمیری عوام دی غیرمشروط حمایت تے آذربائیجان دا شکریہ ادا کریندوں، اساں امید کریندوں جو جنرل اسمبلی اتے سلامتی کونسل ولوں منظور کیتی ڳئی قرارداداں تے عمل تھیسی۔ وزیراعظم آکھیا جو غزہ دی عوام کوں وی مستقل جنگ بندی دی لوڑھ اے۔ وزیراعظم آکھیا جو بین الاقوامی انفراسٹرکچر کوریڈور ویلھے دی اہم لوڑھ اے،گوادربندرگاہ تجارت کیتے اہم اے۔ وزیراعظم آکھیا جو اساں ہک خاندان وانڳوں ہیسے۔ اپریل اچ آذربائیجان دے صدر دے دورے دے منتظر رہسوں۔ پریس کانفرنس توں خطاب کریندیں ہوئیں آذربائیجان دے صدر الہام علیوف آکھیا جو آپݨے بھرا محمد شہباز شریف کوں آذربائیجان دی سرزمین تے خوش آمدید آکھدوں۔ انہاں آکھیا جو خطے دی صورتحال اتے سلامتی دے معاملیاں تے ݙوہیں ملکاں دا ہکو سواں موقف اے۔ گزریل سال پاکستان دے دورے اچ ݙوپاسہ تعاون بارے اہم معاملیاں تے پیش رفت تھئی اے۔ انہاں آکھیا جووزیراعظم شہباز شریف نال ملاقات اچ مختلف شعبیاں اچ تعاون ودھاوݨ تے تفصیلی ڳالھ تھئی اے۔ انہاں آکھیا جو مفاہمت دی یادداشتاں اتے معاہدیاں نال ݙوہیں ملکاں دے تعلقات کوں مضبوط ٻݨاوݨ اچ مدد ملسی۔ پاکستان اتے آذربائیجان معیشت ، سرمایہ کاری ، دفاع ، توانائی سودھے مختلف شعبیاں اچ تعلقات ودھاوݨ دا عزم کیتا ڳئے۔ آذربائیجان دی دفاعی صنعت ودھدی پئی اے۔ دفاعی پیداوار دے شعبے اچ پاکستان دا اہم مقام اے۔ انہاں آکھیا جو پاکستان اساݙا قریبی دوست اے، ݙوہیں ملکاں دی عوام وچال رابطے ودھین۔ بین الاقوامی منظر نامے اچ پاکستان کوں اہم مقام حاصل اے اتے تساݙی محنت اتے دانشمدانہ قیادت اچ پاکستان دی کامیابی تے بھرا دے طور اتے دوست اساکوں فخر اے۔ مستقبل دے منصوبیاں اتے کوششاں اچ بحیثیت بھرا اساں تساݙے نال ہوسوں۔
