اسلام آباد ۔26فروری(اے پی پی) جسٹس امین الدین دی سربراہی اچ سپریم کورٹ دے 7 رکنی آئینی بینچ سویلین دے کورٹ مارشل متعلق انٹرا کورٹ اپیلاں تے سماعت جاری رکھی ۔دوران سماعت سول سوسائٹی دے وکیل فیصل صدیقی ایڈووکیٹ اپݨے دلائل اچ آکھیے جو فوجی عدالتاں دے خلاف 5 رکنی بینچ دا ھک نی، ترائے فیصلے ہن ، جسٹس عائشہ ملک، جسٹس منیب اختر اتے جسٹس یحییٰ آفریدی اپݨے فیصلے لکھیے، سارے ججاں دا ھک ݙوجھے دے فیصلے نال اتفاق ہئی، فیصلے ھکو سویں تے وجوہات مختلف ہوون تاں ساری وجوہات فیصلے دا حصہ تصور تھیندن ۔جسٹس محمد علی مظہر ریمارکس ݙتن جو ججز اضافی نوٹ نی بلکہ فیصلے لکھیے ہن جݙاں جو جسٹس جمال مندوخیل دا آکھݨ ہئی جو سارے پنج ججز متفق ہن جوسویلینز دا ملٹری ٹرائل نی تھی سڳدا ۔فیصل صدیقی ایڈووکیٹ آکھیے بانی پی ٹی آئی عمران خان دے وکیل عذیر بھنڈاری انٹرا کورٹ اپیل دا دائرہ اختیار محدود ہووݨ دا مؤقف اپنائے تاں جو میں عذیر بھنڈاری دے مؤقف نال اتفاق نی کریندا ۔جسٹس محمد علی مظہر آکھیے عذیر بھنڈاری دا انحصار پریکٹس اینڈ پروسیجر کیس اچ جسٹس منصور دے نوٹ تے ہئی ، پریکٹس اینڈ پروسیجر فیصلے اچ ماضی توں اپیل دا حق مل ویندا تاں 1973 توں اپیلاں آویندیاں ، جیں تے وکیل فیصل صدیقی آکھیے اپیل دا دائرہ محدود کرݙتا تاں ساݙیاں کئی اپیلاں وی خارج تھی ویسن ۔جسٹس امین الدین آکھیے فیصلہ ݙیوݨ آلا بینچ ہی نظرثانی اپیل سݨدے جݙاں جو انٹرا کورٹ اپیل لارجر بینچ سݨدے ، لارجر بینچ مقدمہ پہلی واری سݨدا پیاہوندے ایں سانڳے پہلے فیصلےدا پابند نی ہوندا ۔وکیل سول سوسائٹی فیصل صدیقی آکھیے میݙا آئینی بینچ تے مکمل اعتماد اے۔ فیصل صدیقی آکھیے آئینی بینچ آرمی ایکٹ دی شقاں کالعدم قرار ݙتے بغیر وی سویلین دا ٹرائل کالعدم کرسڳدے ، سیکشن 94 دے تحت کمانڈنگ افسر کوں ملزمان دی حوالگی دا صوابدیدی اختیار درست کائنی ۔جسٹس نعیم اختر افغان پچھیے جو اے ٹی سی جج دا ملزم حوالے کرݨ دا کوئی باضابطہ حکمنامہ اے؟ جیں تے فیصل صدیقی جواب ݙتے جو حکم نامہ تاں ہے لیکن ایں وچ وجوہات نی ݙتیاں ڳیاں ۔جسٹس جمال مندوخیل پچھیے جو عدالت کوں خود ݙیکھݨا ہوندے جو ایں کوں اختیار سماعت ہے یا کائناں؟ کیا لازمی اے جو کوئی فریق ہی دائرہ اختیار دا اعتراض کرے؟ جئیں تے جسٹس امین الدین آکھیے عدالت کوں خود اپݨا دائرہ اختیار طے کرݨا ہوندے ۔ بعداچ کیس دی سماعت خمیس تئیں ملتوی کرݙتی ڳئی۔
