اسلام آباد۔26فروری(اے پی پی) چیئرمین سینیٹ سید یوسف رضا گیلانی نال عراق دے سفیر حامد عباس علی الارمشاوی پارلیمنٹ ہاؤس اچ ملاقات کیتی جیں اچ پاکستان تے عراق وچال ݙو پاسے تعلقات ودھاوݨ تے ڳالھ مہاڑ کیتی ڳئی ۔ ملاقات اچ تجارتی، اقتصادی، پارلیمانی، مذہبی و ثقافتی رابطے تے ڳالھ مہاڑ تھئی ۔ چیئرمین سینیٹ آکھیے پاکستان تے عراق تاریخی، ثقافتی اتے مذہبی رشتے اچ گھنڈیے پئن ، ݙوہیں ملکاں وچال تعاون مزید ودھاوݨ دی لوڑھ اے ۔ انسانی وسائل، تجارت، آئی ٹی، ٹیکسٹائل اتے توانائی دے شعبیں اچ تعاون ودھاوݨ دی لوڑھ اے ۔ ملاقات اچ پارلیمانی سفارتکاری اتے وفد دے تبادلے ودھاوݨ تے اتفاق کیتا ڳئے ۔ سید یوسف رضا گیلانی زراعت، تجارت، پاݨی، توانائی، تعلیم، سیاحت اتے دفاع اچ تعاون ودھاوݨ تے زور ݙیندے آکھیے پاکستانی زائرین دے انتظامات کوں مزید منظم کرݨ دی ٻہوں لوڑھ اے ۔پاکستان تےعراق وچال براہ راست فضائی رابطے توں عوامی رابطے مستحکم تھیسن ۔ ہر سال ڈھائی لکھ پاکستانی زائرین مقدس جہیں تے حاضری سانڳے عراق ویندن ۔چیئرمین سینیٹ دی عراقی سفیر کوں ملتان دے دورے اتے سرمایہ کاراں نال ملاقات دی دعوت ݙتی تے آکھیے جو ݙوپاسے تعاون ودھاوݨ سانڳے پارلیمانی فرینڈشپ گروپ دا کردار اہم اے۔افرادی قوت اتے ٻئے شعبیں اچ ایم او یوز تے عملدرآمد دی لوڑھ اے ۔ سید یوسف رضا گیلانی آکھیے زراعت، دفاع تے تجارت اچ تعاون ݙوہیں ملکاں کوں نیڑے گھن آسی ۔عراق دے سفیر ݙوپاسے تعلقات مزید تکڑے کرݨ دا عزم کریندے آکھیے عراقی ایوان نمائندگان دے سربراہ دی طرفوں چیئرمین سینیٹ کوں دورہ عراق دی دعوت ݙتی ۔ عراق پاکستان نال تجارتی، اقتصادی اتے ثقافتی تعلقات مستحکم کرݨ سانڳے پرعزم ہن۔
