اسلام آباد۔27فروری(اے پی پی)وفاقی وزیر برائے تجارت جام کمال خان ازبکستان دے شہر الملیک اچ الملیک مائننگ اینڈ میٹالرجیکل کمپلیکس دا دورہ کیتے جیڑھا ملک اچ تانبے (کاپر) دی پیداوار دا ہک وݙا مرکز اے۔ دورے دا مقصد پاکستان اتے ازبکستان وچال کان کنی دے شعبے اچ تعاون دے امکانات دا جائزہ ڳھنݨ اے۔ وفاقی وزیر تجارت دورے اچ مائنز، کنسنٹریشن سیکشن اتے اسملٹر سودھا کمپلیکس دے مختلف حصیاں دا معائنہ کیتے۔ وزیر تجارت دا ازبکستان دے وزیر برائے مائننگ و جیولوجی، بوبیر فرہودوویچ اسلاموف اتے الملیک کمپلیکس دے چیئرمین عبداللہ خورسانوف استقبال کیتے۔ ایں موقع تے وفاقی وزیر برائے سرمایہ کاری عبدالعلیم خان اتے سیکریٹری پٹرولیم و مائننگ مومن آغا وی انہاں دے نال ہن۔ ازبکستان دے وزیر برائے سرمایہ کاری، صنعت و تجارت لازیز قدرتوف اتے وزیر برائے مائننگ و جیولوجی بوبیر فرہودوویچ اسلاموف وی ملاقات اچ ہن۔
