اسلام آباد۔27فروری(اے پی پی)وفاقی وزیر خزانہ و محصولات سینیٹر محمد اورنگزیب ٹیکس، توانائی، سرکاری اداریاں دی نجکاری اتے ٻعے ڈھانچہ جاتی اصلاحات اڳو تے ودھاوݨ دا عزم کریندے آکھیے جو معیشت مستحکم تھی چکی اے، حکومت مالیاتی نظم و ضبط، محصولات اچ ودھارے اتے سرمایہ کاری سانڳے کم کریندی پئی اے، نیشنل ٹیکس کونسل فعال ٻݨاوݨ نال وفاقی حکومت اتے صوبیاں وچال ہم آہنگی ودھسی۔ جیفریز انویسٹرز دے سرمایہ کاراں اتے پاکستان میوچل فنڈز ایسوسی ایشن (میوفاف) دے وفداں نال الیندے آکھی۔ جیفریز وفد دی قیادت عالیہ موبائید کریندی پئی عئی۔ آفد اچ ایچ بی کے انویسٹمنٹ مینجمنٹ دے وسل نکولوف، بیرنگز دے خالد سلیمی، ایشمور دے زن ژو، فڈیلٹی دے سلمان احمد، جیفریز دے خرم شیخ اتط کے ٹریڈ سکیورٹیز دے محمود علی شاہ بخاری شامل ہن۔ ملاقات اچ پاکستان دی مجموعی معاشی صورتحال، سرمایہ کاری مواقع اتے جاری معاشی اصلاحات دا جائزہ ڳھدا ڳئے۔ وفد عالمی سرمایہ کاراں نال روابط تجڑے کرݨ کیتے وزیر خزانہ کوں مئی 2025 اچ لندن اچ تھیوݨ آلے ‘پاکستانی انویسٹرز ڈے’ اچ شرکت دی دعوت ݙتی۔ وزیر خزانہ پاکستان دے معاشی استحکام، ٹیکس اصلاحات، محسولات دے ودھارے اتے برآمدات تے مبنی معیشت کوں فروغ ݙیوݨ کیتے حکومتی عزم دا ݙسائے۔ وزیر خزانہ نال پاکستان میوچل فنڈز ایسوسی ایشن (میوفاف) دا وفد وی ملیے۔ ایں موقع تے سکیورٹیز اینڈ ایکسچینج کمیشن آف پاکستان دے چیئرمین اتے وزارت خزانہ و محصولات دے سینئر حکام وی موجود ہن۔ میوفاف وفد دی قیادت ڈائریکٹر آفتاب دیوان کیتی۔ وفد پاکستان دی میوچوئل فنڈ انڈسٹری دا جائزہ پیش کیتے۔ ملاقات اچ مالیاتی شعبے کوں تکرا کرݨ کیتے کلیدی پالیسی تجاویز تے الایا۔ وفد کنٹری بیوٹری پنشن سکیم اچ اصلاحات دی تجویز ݙیندے حکومتی اجارہ سکوک کیتے مارکیٹ لیکویڈیٹی دی بہتری سودھا ادارہ جاتی شرکت سانڳے اوپن مارکیٹ آپریشنز متعارف کراوݨ تے زور ݙتے۔ انہاں سرمایہ کاری تے ٹیکس کریڈٹ دی بحالی دی سفارش کیتی اتے عالمی سطح تے کامیاب تعلیمی بچت منصوبیاں آلی کار ”پاکستان ہائر ایجوکیشن سیونگز فنڈ” دے قیام دی وی تجویز ݙتی جو خانداناں کوں ٻالاں دی تعلیم کیتے مالی منصوبہ بندی اچ مدد ملے۔ وزیر خزانہ ساریاں تجاویز دے جائزے کیتے ایس ای سی پی اتے متعلقہ حکام کوں اصلاحات تے کم کر تے جامع مالیاتی نظام سانڳے اقدامات دی ہدایت کیتی۔
