اسلام آباد۔14مارچ (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو جی ایس پی پلس دی سہولت دی تجدید کیتے یورپی دارالحکومتاں نال ٻئے رابطیاں دی لوڑھ اے۔ جی ایس پی پلس آئندے سالیں اچ پاکستان دے یورپی یونین نال تجارتی تعلقات کیتے اہم اے۔ انہاں اے ڳالھ جمعے کوں یورپی یونین دی سفیر ڈاکٹر راینا کیونکا نال ملاقات اچ آکھی۔ ملاقات اچ ݙوہیں رہنماواں آپسی دلچسپی دے کئی معاملے خصوصی طور یورپی یونین اتے پاکستان وچال کاروباری اتے سرمایہ کاری دے تعلقات کوں مستحکم کرݨ تے ڳالھ کیتی۔ انہاں پاکستان اچ یورپی کاروباری اداریاں کیتے موقعیاں دا جائزہ وی ڳھدا اتے سرمایہ کاری کیتے سازگار ماحول دی لوڑھ تے زور ݙتا تانجو ودھدے ہوئے کاروباری موقعیاں کوں طریقے نال استعمال کیتا ونڄ سڳے۔ ڈاکٹر کیونکا ݙسیا جو یورپی یونین پاکستان اچ کم کرݨ آلے 300 توں ودھ یورپی کمپنیاں دا احاطہ کیتے۔ ڈاکٹر کیونکا نیوزیرخزانہ کوں یورپی یونین مشن ولوں اسلام آباد اچ مئی 2025 دے ادھ اچ تھیوݨ آلے کاروباری اتے سرمایہ کاری فورم اچ شرکت دی دعوت ݙتی۔ وزیرخزانہ ڈاکٹر کیونکا دا شکریہ ادا کیتا اتے فورم کراوݨ اچ حمایت دا یقین ݙوایا۔ وزیر خزانہ یورپی کمپنیاں کیتے فعال اتے متحد کاروباری پلیٹ فارم ٻݨاوݨ دے خیال دا خیرمقدم کیتا۔ وزیرخزانہ خصوصاً جنرلائزڈ اسکیم آف پریفرنسز پلس (جی ایس پی پلس) دی سہولت دی اہمیت کوں اجاگر کیتا۔
